ОХУ-ын Онцгой байдлын сайд Евгений Зиничев Арктикийн Норильск хотод болсон сургуулилтын үеэр хүний амь аврах гэж оролдох явцдаа нас барсан болохыг тус улсын Онцгой байдлын яамнаас мэдээлжээ.

Яамны мэдэгдэлд "Норильскт болсон Арктикийн бүсийг онц байдлаас хамгаалах сургуулилтын үеэр үүргээ гүйцэтгэж явсан Онцгой байдлын яамны дарга Евгений Зиничев хүний амь аварч байхдаа амиа алдсан тухай дуулгахад харамсалтай байна" хэмээн тэмдэглэсэн байна.

Ерөнхийлөгч Владимир Путин Онцгой байдлын сайдын харамсалтайгаар нас барсанд явдалд гүн эмгэнэл илэрхийлж, Зиничевийн гэр бүл, найз нөхөдтэй холбогдсон гэж Кремлийн хэвлэлийн төлөөлөгч Дмитрий Песков мэдэгджээ. Тус улсын Ерөнхий сайд Михаил Мишустин мөн тэдэнтэй холбогдон, эмгэнэл илэрхийлсэн байна.

55 настай байсан Евгений Зиничев 1966 оны 8 дугаар сарын 18-нд Ленинград хотод төрсөн юм. Тэрээр 1987 оноос хойш Оросын аюулгүй байдлын байгууллагуудад ажиллах болсон бөгөөд Ерөнхийлөгч Владимир Путины хамгаалалтын албанд ч ажиллаж байжээ. 2014 онд Зиничев Холбооны аюулгүй байдлын албаны Терроризмтой тэмцэх албаны орлогч дарга болсон байна.

2016 оны 7 дугаар сард тэрээр Калининград мужийн Захирагчийн үүрэг гүйцэтгэгчээр томилогджээ. Харин тус оны 10 дугаар сараас 2018 оны 5 дугаар сар хүртэл ОХУ-ын Холбооны аюулгүй байдлын албаны орлогч даргаар ажилласан байна. Ингээд Зиничев 2018 оны 5 дугаар сарын 18-нд Онцгой байдлын сайдаар томилогджээ. 

Эх сурвалж: TASS

---