Зүүн Европын Умард Македониа улсад коронавирусийн халдвар авсан өвчтөнүүдийг хэвтүүлэн эмчилж байсан эмнэлэг шатаж, багадаа 10 хүн нас барсан байна. Тетово хотын эмнэлэг шатах үед өтгөн хар утаа ойр орчимд тархжээ.

Орон нутгийн цагаар лхагва гарагийн орой 21 цагийн үед гарсан галыг гал сөнөөгчид цагийн дотор унтраасан байна. Эрүүл мэндийн сайд Венко Филипче хохирогчдын тоо цаашид нэмэгдэж болзошгүй гэдгийг анхааруулжээ.

Шатсан эмнэлгийн зарим өвчтөнийг нийслэл Скопье хот дахь эмнэлэг рүү яаралтай шилжүүлсэн байна. Эмч нар галд өртөж, түлэгдсэн болоод гэмтэж бэртсэн өвчтөнүүдийн амь насыг аврахын төлөө тэмцэж байгааг Эрүүл мэндийн сайд онцлов. Шатах үед Тетово хотын эмнэлэгт хэдэн хүн байсан нь одоогоор тодорхойгүй байна.

Тус эмнэлгийн барилгыг коронавирусийн халдвар авсан хүнд хүмүүсийг эмчлэхээр өнгөрсөн жил нээжээ. Хоёр сая гаруй хүн амтай улсад коронавирусийн халдварын 180,000 гаруй тохиолдол бүртгэгдэж, 6,153 хүн нас баржээ.

Эх сурвалж: ВВС

---