Нийслэлийн зургаан цэгт иргэдээс түргэвчилсэн шинжилгээг үнэ төлбөргүй авч байгаа ч нэг цэгт зөвхөн 100-150 иргэнээс авч байгаа юм. Тэгвэл ХӨСҮТ дээр харьяалал харгалзахгүй PCR шинжилгээг үнэ төлбөргүй өгөх боломжтой. Өнгөрсөн сарын сүүлээр ХӨСҮТ шинжилгээний сорьц дууссан тул иргэдээс шинжилгээ авахгүй байсан бол энэ сарын эхээр шинжилгээ сорьц ирж, иргэдээс шинжилгээ авч эхэлсэн.

Гэвч сүүлийн хэд хоногоос өдөрт илрэх халдварын тоо нэмэгдэж, Улаанбаатарт өдөрт дунджаар 1300-1400 хүн халдвартай гэж батлагдаж байгаа билээ. Иймд ойрын хавьтал болсон иргэдийн хувьд түргэвчилсэн шинжилгээнээс илүү PCR шинжилгээ өгөхөөр ХӨСҮТ-ийг зорих болжээ.

Манай сурвалжлах багийг 11 цагийн үед ХӨСҮТ дээр очиход тест дууссан гэх шалтгаанаар олон иргэдийг буцааж байлаа.

Иргэдийн хувьд урьд шөнийн 10 цагаас эхэлж, дугаарлан орсон бол өглөөний 07.00-09.00 цагт ирсэн иргэдийн хувьд шинжилгээ өгч чадалгүй гадаа нь зогсож байлаа.

Гадаа хүйтэнд 4-5 цаг зогссон иргэдийн хувьд ямар ч зохион байгуулалт байхгүй байгаад шүүмжлэлтэй хандсан юм. Нэг газар ингэж олон хүнийг цуглуулж байгаа нь эрсдэлтэй учраас цагийн хязгааргүй шинжилгээ авах хэрэгтэй гэлээ.

ХӨСҮТ-ийн албаны хүний өгсөн тайлбараар бол 07.30 цагт ирсэн цаанаасаа 700 сорьц өгсөн ингээд 700 хүнээс шинжилгээ авсан. Дахиж сорьц өгөхгүй тул үлдсэн хүмүүсээс шинжилгээ авах боломжгүй гэсэн юм.

Тун удахгүй ХӨСҮТ-ийн удирдах албаны хүмүүсээс LIVETV тайлбар мэдээллийг хүргэх болно.

---