Мексикийн төв хэсгийн Хидалго мужид их хэмжээний хур тунадас унасны улмаас үер бууж, дор хаяж 17 хүн амиа алджээ.

Үерийн улмаас Тула хотын нэгэн эмнэлгийн цахилгаан хангамж тасарсан гэж орон нутгийн хэвлэлүүд мэдээлж байгаа юм. Амиа алдсан иргэдийн зарим нь коронавирусийн өвчтөнүүд байсан бөгөөд тэд хүчилтөрөгчийн төхөөрөмжийн тусламжтайгаар амьсгалж байсан аж. Аврагчид тус эмнэлгээс 40 орчим өвчтөнийг нүүлгэн шилжүүлжээ.

Нийтдээ Хидалго мужийн 30 гаруй мянган хүн үерт нэрвэгдсэн байна. Энэ үеэр мөн тус мужийн захирагч Омар Фаядыг тээвэрлэж явсан завь голын усанд живсэн гэх мэдээлэл байгаа юм. Фаяд дараа нь өөрийгөө "эрүүл саруул байгаа" хэмээн мэдэгдсэн ба мужийн эрх баригчид үерт автсан бүс нутагт яаралтай тусламжийн ажлыг үргэлжлүүлэн зохион байгуулна гэж онцолсон байна.

Эх сурвалж: BBC

---