Францын нийслэл Парис хот дахь Италийн алдарт тансаг зэрэглэлийн Bulgari брэндийн дэлгүүрээс бүлэг этгээд 10 сая еврогийн үнэт эдлэл хулгайлжээ. Цагдаа нар гэмт этгээдүүдийн араас нэхэн хөөж, хоёр сэжигтнийг баривчлан саатуулсан байна.

Одоо мэдэгдэж байгаагаар гурван этгээд буугаар зэвсэглэж Ритз зочид буудалд байрладаг Place Vendome-ийн Bulgari ордонд мягмар гарагийн үд дундын үед дээрэм хийсэн байна. Гурван этгээд саарал өнгийн BMW маркийн автомашинтай, дээрэм хамтран үйлдсэн бусад дөрвөн этгээд скүтертэй хэргийн газраас зугтаажээ.

Автомашиныг хэргийн газраас хоёр км-т Les Halles худалдааны төвийн ойролцоо явж байхад нь цагдаа нар нэхэж гал нээсэн байна. Энэ үед гэмт этгээдүүд машинаасаа бууж явган зугтаахыг оролджээ. Хоёр этгээдийг барьсан ч үлдсэн сэжигтнүүдийг үргэлжлүүлэн хайж байна.

Эх сурвалжийн мэдээлж байгаагаар ойрын саруудад Парис дахь тансаг зэрэглэлийн үнэт эдлэлийн орднууд зэвсэглэсэн этгээдүүдийн халдлагад өртөх нь нэмэгджээ. Өнгөрсөн долдугаар сарын 27-ны өдөр цахилгаан скүтертэй этгээд Chaimet ордноос хоёр сая еврогийн үнэт эдлэл дээрэмдсэн байна. Үүнээс гурав хоногийн дараа зэвсэгтэй хоёр этгээд Dinh Van дэлгүүрээс 400,000 еврогийн хулгай хийжээ.

Парисын Place Vendome нь Bulgari-аас гадна Chanel, Boucheron, Van Cleef& Arpels зэрэг тансаг зэрэглэлийн брэндүүд байрладаг гол газар юм.

Эх сурвалж: The Guardian

---