ХБНГУ-аас БНХАУ-д суухаар томилогдсон элчин сайд Ян Хекер үүргээ гүйцэтгэж эхлээд ердөө хоёр долоо хонож байсан ч тодорхойгүй шалтгаанаар гэнэт нас барсан тухай мэдээлжээ. Уг мэдээллийг Германы эрх баригчид ихэд цочирдож хүлээж авсан ба гүн эмгэнэл илэрхийлсэн байна.

54 настай элчин сайдын үхлийн шалтгааныг тодорхой мэдээлээгүй ажээ. Германы канцлер Ангела Меркелийн гадаад бодлогын зөвлөхийн албан тушаалд байсан Хекер  БНХАУ-д суух элчин сайдын алба хашихаар наймдугаар сарын эхэнд Бээжинд газардаж, 24-ний өдрөөс ажилдаа оржээ. Тэрээр эхнэр, гурван хүүхдийн хамт ирсэн ба түүнийг гэнэтийн байдлаар нас барсны дараа дэд сайд байсан Франк Рукерт үргэлжлүүлэн үүрэг гүйцэтгэхээр болсон байна.

Канцлер Ангела Меркель “Ян Хекерийг нас барсан тухай сонсоод ихэд цочирдлоо. Түүнтэй удаан хугацаанд, ойр дотно хамтарч ажиллаж байснаараа бахархаж байна. Түүний хайртай гэр бүл, ойр дотны хүмүүст гүн эмгэнэл илэрхийлье” гэжээ. Ян Хекер Меркелийн гадаад бодлогын зөвлөхөөс гадна 2015 оноос хойш улс төрийн дотны хүрээлэлд нь нөлөө бүхий тоглогч байсан юм.

Эх сурвалж: The Guardian

---