Залуучуудын хөгжил, хөдөлмөр эрхлэлтийг дэмжих, хөдөлмөрт бэлтгэх, ажлын байраар хангах зорилгоор ажил мэргэжлийн чиг баримжаа олгох, хувь хүний хөгжлийн цогц сургалтын хөтөлбөрөөр явагдах “Оролцоо” төслийн сургалт, үйл ажиллагаа үргэлжилж байна.

Төсөлд хамрагдаж буй залуус эрүүл, идэвхтэй амьдралын хэв маяг, эх оронч үзлийг төлөвшүүлэх зорилгоор "МАРШ ТАКТИК"-ийн тэмцээнийг зохион байгууллаа.

Монгол улсын 21 аймаг, есөн дүүргээс "Оролцоо" төсөлд хамрагдахаар бүртгүүлж, сонгон шалгаруулалтад тэнцсэн 18-34 насны 1000 залуу Үндэсний Батлан хамгаалах их сургуулийн “Шар хад” дахь сургалтын төв болон Зэвсэгт хүчний 311 дүгээр ангийн сургалтын хотхонд хуваагдан байрлаж, 14 хоногийн хугацаанд хүний хөгжлийн цогц сургалтад хамрагдаж байна.

Монгол Улсын Засгийн газрын “Эрүүл мэндээ хамгаалж, эдийн засгаа сэргээх 10 их наяадын цогц төлөвлөгөө”-ний 2.6 дахь заалт болон 2021 оны 58 дугаар тогтоолоор батлагдсан залуучуудыг хөдөлмөрт бэлтгэх “ОРОЛЦОО” төслийн хүрээнд нийт 5000 гаруй залуусыг хувь хүний хөгжлийн цогц сургалтад 12 ээлжээр хамруулан хөдөлмөрт бэлтгэх юм.

“Оролцоо” төсөл нь залуучуудад эрүүл, идэвхтэй амьдралын хэв маяг, эх оронч үзлийг төлөвшүүлэх, ажил мэргэжлийн чиг баримжаа олгох, зөвлөгөө өгөх замаар хөдөлмөрт бэлтгэж, хөдөлмөр эрхлэх хүсэл сонирхлыг бий болгож, ажилтай, орлоготой болгох зорилготой юм.

---