"Токио-2020" паралимпын наадмын Бөөрөнцөг түлхэлтийн "F20" ангилалд аварга болсон Малайзын тамирчин Мухаммед Зияд Золкефли тэмцээндээ гурван минутаар хоцорч ирсэн тул Олон улсын паралимпын хорооноос түүний алтан медалийг хүчингүй болгох шийдвэрийг гаргажээ.

Золкефли тэмцээнд оролцох үед түүнийг хоцрох "тодорхой" шалтгаантай байсан гэж үзэн, тэмцээнд оролцохыг зөвшөөрсөн гэж тус хорооноос мэдээлсэн байна. Гэвч хожим нь шүүгч түүнийг хоцрох "үндэслэлтэй шалтгаангүй" байсныг олж мэдсэн бөгөөд алтан медалийг нь хурааж аван, мөнгөн медаль авсан Украйны тамирчин Максим Ковальд өгсөн аж.

Энэхүү шийдвэр нь олон нийтийн сүлжээгээр ихээхэн шүүмжлэл дагуулж байгаа бөгөөд ялангуяа Малайзын иргэдийн дургүйцлийг хүргээд байгаа юм. Тус улсын Парламентын гишүүн Фахми Фадзил энэ талаар "Үнэхээр гутамшигтай явдал! Хэрвээ тамирчин хоцорсон бол түүнийг тэмцээнд оролцуулах ёсгүй байсан. Зияд дэлхийн дээд амжилтыг эвдсэн бөгөөд түүний хүч хөдөлмөрөө гаргаж авсан медалийг бүү хулгайл" хэмээжээ.

Мухаммед Зияд Золкефли болон түүнтэй хамт хоцорсон хоёр тамирчин тухайн үед "Зарлалыг сонсоогүй, мэдэхгүй хэлээр зарласан" хэмээн мэдүүлсэн аж.

Эх сурвалж: BBC

---