АНУ-д Айда хар салхины хор хөнөөл үргэлжилж, зүүн хойд зүгт буусан их хэмжээний үерийн улмаас 41 хүн ​​амиа алджээ. Ерөнхийлөгч Жо Байден нас барсан иргэдэд эмгэнэл үзүүлээд, уур амьсгалын өөрчлөлтөөс үүдэлтэй хямралыг даван туулахад "түүхэнд байгаагүй хөрөнгө оруулалт" шаардлагатай хэмээн тэмдэглэсэн байна.

Нью Жерси муж болон Нью-Йорк хотод урьд өмнө байгаагүй их хэмжээний хур тунадас унасан бөгөөд зарим оршин суугчид үерт автсан хонгил, автомашиндаа гацсан аж. Тус улсын нийт дөрвөн мужид хар салхинаас үүдэлтэй нас баралт бүртгэгдээд байгаа юм.

Олон нийтийн сүлжээгээр тархсан бичлэгүүдэд Нью-Йорк хотын газар доорх метроны буудлууд руу их хэмжээний ус цутган орж байгаа нь харагдах аж. Мөн галт тэрэг, онгоц, автобусаар зорчиж явсан хүмүүс үерийн усанд хэдэн цагийн турш боогдон, гацсан байна.

Ерөнхийлөгч Байден өнөөдөр Айда хар салхинд хамгийн түрүүнд өртсөн Луизиана мужид очин, нөхцөл байдалтай танилцан, хэрэгтэй туслалцааг үнэлэх аж. Одоогийн байдлаар тус мужид 900 мянга гаруй байшин цахилгаангүй хэвээр байгаа юм.

Эх сурвалж: BBC

---