Энэтхэг улс агаарын бохирдлоор дэлхийд тэргүүлдэг улс орнуудын тоонд багтдаг. Агаарын бохирдол нь тус улсын олон зуун сая иргэний насжилтыг 10 орчим жилээр богиносгож байна гэсэн судалгааг хийжээ.

АНУ-д төвтэй Эрчим хүчний бодлогын хүрээлэнгийн танилцуулсан судалгаанд Энэтхэгийн 1,3 тэрбум иргэн жил бүр ДЭМБ-ын аюулгүй гэж тогтоосон хэмжээнээс давуулсан бохирдолтой агаараар амьсгалдаг гэдгийг дурдсан байна. Энэтхэгийн Засгийн газар 2019 оноос үндэсний хэмжээнд цэвэр агаартай байх аяныг зарласан. Уг аяны үр дүнд 2024 он гэхэд макро хэмжээний бохирдлыг 30 хувиар бууруулах зорилго тавьжээ. Нэн ялангуяа Махараштра, Мадхьяа Прадеш мужуудад агаарын бохирдлыг бууруулах нэн шаардлагатай гэж үзсэн байна.

Гэвч нийслэл Дели хот агаарын бохирдол ихтэй бүсэд тооцогдоно гэж уг судалгаанд дурджээ. Хэрэв агаарын бохирдлын хэмжээг ДЭМБ-ын аюулгүй гэж заасан түвшинд хүргэвэл Дели хотын оршин суугчдын насжилт 10 жилээр нэмэгдэнэ гэж үзсэн байна. Харин улсын дотоод стандартад нийцсэн бохирдолтой бол багадаа долоон жилээр оршин суугчдын нас уртасна гэжээ.

Мөн судалгаагаар агаарын бохирдол нь Энэтхэгийн иргэдийн 40 орчим хувь буюу 520 сая иргэний насжилтыг бууруулж байна гэжээ. Олон тооны тээврийн хэрэгсэл, аж үйлдвэрийн хаягдал, газар тариалангийн талбайг санаатайгаар шатаах зэрэг нь агаарын бохирдлын гол эх үүсвэрүүд болдог. 2019 онд дэлхий дээр хамгийн их агаарын бохирдолтой 30 хотын 21 нь Энэтхэгийн хотууд байсан юм.

Эх сурвалж: CNN

---