"Apple" компанийн Гүйцэтгэх захирал Тим Күк тус албан тушаалд очсоны 10 жилийн ойг тохиолдуулан түүнд 750 сая ам.долларын үнэд хүрэх таван сая гаруй хувьцааг урамшуулал болгон өгсөн байна.

Мөн энэхүү хувьцааг Күк тэр дор нь зарсан болох нь ил болжээ. Дэлхийн хамгийн үнэ цэнтэй компанийн тэргүүний хувьд Күк сүүлийн жилүүдэд их хэмжээний шагнал, урамшууллыг хүртэж байгаа юм. Түүний удирдлага дор "Apple" компанийн хувьцаа эзэмшигчид 2018 оны 8 дугаар сараас 2021 он хүртэлх хугацаанд бараг 192 хувийн ашиг олсон аж.

Үүнээс хэдхэн өдрийн өмнө Күк ойролцоогоор 10 сая ам.долларт хүрэх 70 мянган ширхэг хувьцааг сайн үйлсийн аянд хандивласан нь ил болоод байсан билээ.

Тим Күк анх 1998 онд "Apple" компанид орсон бөгөөд хэд хэдэн өндөр албан тушаалыг хашиж байсан. Харин тус компанийн үүсгэн байгуулагч Стив Жобс 2011 оны 8 дугаар сард албан тушаалаасаа огцорсны дараа тэрээр Гүйцэтгэх захирлаар томилогдсон юм. Тэгвэл Тим Күк өнгөрсөн онд албан ёсоор тэрбумтан болсон бөгөөд өнөөдрийн байдлаар 1.5 тэрбум ам.доллар орчмын хөрөнгөтэй гэж тооцогдож байна.

Эх сурвалж: CNN

---