Монгол Улсын Ерөнхийлөгчийн нэрэмжит 2 тэрбум төгрөгийн тэтгэлэг, урамшуулал зарлагдсан талаар ЕТГ-ын дарга Я.Содбаатар мэдээлэл хийлээ.

Тус тэтгэлгийг
-330 сум, 171 хорооноос ЭЕШ-аа амжилттай өгч, өндөр оноо авсан тус бүр нэг сурагчийг их, дээд сургуульд элсэх бэлтгэл хөтөлбөрт элсүүлэх,
-Гадаадын их, дээд сургуульд суралцах эрх авсан оюутан залууст, тэр дундаа дэлхийн Топ-100 сургуульд элссэн оюутанд, 
-Гадаадын чансаа өндөр олимпиад, тэмцээн уралдаанд амжилттай оролцсон хүүхдүүдэд олгоно. 

Энэхүү шалгуурт тэнцсэн нийт 504 сурагчид дотоодын болон гадаадын их, дээд сургуульд суралцах тэтгэлэг олгох болсныг мэдэгдлээ.

Мөн, тэтгэлгээс гадна олон улсын уралдаан тэмцээнд оюуны спортоор амжилт үзүүлсэн оролцогчдод нэг удаа мөнгөн урамгуулал олгох зарлиг гаргажээ.

Монгол Улсын баг сүүлийн таван жилд Олон улсын математик, физик, мэдээлэл зүй, хими, биологийн олимпиадаас 52 медаль авсан байна.

Зөвхөн 2021 онд гэхэд л математикийн олимпиадаас хоёр алт, хоёр мөнгө, хоёр хүрэл, физикийн олимпиадаас хоёр хүрэл, мэдээлэл зүйн олимпиадаас нэг мөнгө, химийн олимпиадаас хоёр мөнгө, нэг хүрэл, биологийн олимпиадаас нэг мөнгө, хоёр хүрэл, нийт 15 медаль буюу түүхэндээ хамгийн олон медаль хүртжээ.

Иймд оюуны спортод амжилт үзүүлсэн 17 хүүхэд, тэдний багш нарт мөнгөн урамшууллыг нь энэ долоо хоногт олгох юм байна.

Дээрх тэтгэлэг, мөнгөн урамшуулалд жил бүр хоёр тэрбум орчим төгрөг зарцуулах бөгөөд Боловсролын зээлээр дамжиж олгогдох юм байна. 

---