АНУ-ын Луизиана мужийг Айда хар салхи дайрсны дараа Нью Орлеанс хот тэр чигээрээ цахилгаангүй болжээ.

Хар салхины хурд 240 км/цагт хүрсэн бөгөөд нүүлгэн шилжүүлэлтэд хамрагдаагүй иргэдийг байрандаа хоргодохыг албаныхан зөвлөсөн байна. Нью Орлеансыг 2005 онд Катрина хар салхи дайрч өнгөрөх үеэр нийт 1,800 хүн амиа алдаж, үүний дараа хотын үерийн хамгаалалтыг бэхжүүлэн барьсан бөгөөд энэ удаагийн хар салхи нь үүний туршилт болох юм.

Айда хар салхи нь эрэг хавиас хол эх газарт ч асар их сүйрэл учруулах магадлалтай ба "Амь насанд аюултай" гэж АНУ-ын Ерөнхийлөгч Жо Байден иргэддээ анхааруулжээ. Одоогийн байдлаар Луизиана мужийн 750 мянга гаруй байшин цахилгаангүй байгаа бөгөөд хангамжийг сэргээхэд хэдэн долоо хоног шаардагдана гэж Ерөнхийлөгч Байден мэдэгдсэн байна.

Ням гарагт Нью Орлеанс хотын өмнөд хэсгийг 4 дүгээр ангиллын хар салхи дайрсан бөгөөд энэ нь барилга байгууламж, мод, цахилгааны шугамд ноцтой хохирол учруулах боломжтой гэсэн үг юм. Харин одоо хар салхины хүч бага зэрэг суларч, 3 дугаар ангиллын шуурга болж хувирсан байна.

Зарим газарт далайн давлагаа 4.8 метр хүртэлх өндөрт хүрч, нам дор эргийн ойролцоох хэсгийг тэр чигээр нь усанд автуулах магадлалтай байгаа аж.

Эх сурвалж: BBC

---