Токио-2020 олимпийн наадмаас манай улсын тамирчид дөрвөн медаль хүртсэн. Тэдний нэг хоёр жилийн өмнө Монгол улсын иргэн болсон Саиед Моллай. 

Гэвч тэрбээр өчигдөр Монголын Засгийн газар болон Үндэсний олимпийн хороонд гомдолтой байгаагаа мэдэгдсэн. Ингэхдээ Засгийн газар нь хүлээж авч уулзаагүй. Бусад тамирчдад байр өгчихөөд надад өгөөгүй хэмээн гомдоллосон юм. 

Албаныхны өгч байгаа мэдээллээр Япон улсаас ирсэн тамирчид 14 хоног тусгаарлагдах байжээ. Уг хугацаа дуусах үед Засгийн газраас олимпийн медальт тамирчидаа хүлээж авч шагнаж урамшуулахаар төлөвлөсөн байна. 

Олимпын мөнгөн медальт Саиед Моллайтой холбоотой асуудлаар Биеийн тамир, спортын улсын хорооны дарга Ц.Шаравжамц мэдээлэл хийлээ. 

Ц.Шаравжамц: Токиогийн олимпын нээлтэд Ерөнхий сайд оролцон, эх орондоо буцаж ирмэгцээ наймдугаар сарын 4-ний өдрийн Засгийн газрын хуралдаанаар олимпын наадмаас медаль авсан тамирчдадаа байр олгох тухай шийдвэрийг гаргасан байгаа.

Мөн мөнгөн медаль хүртсэн тамирчинд нэг удаагийн мөнгөн урамшуулал болох 60 сая төгрөг, түүнээс гадна сар бүрийн урамшуулал гурван сая төгрөгийг 2022 оны нэгдүгээр сараас олгох юм. 

Олимпод оролцсон тамирчдын сүүлийн ээлж наймдугаар сарын 10-нд эх орондоо ирсэн бөгөөд Улсын Онцгой комиссоос тамирчдыг 14 хоног гэртээ байж тусгаарлагдахыг зөвлөсөн. Сүүлийн ээлжид ирсэн тамирчдын тусгаарлалтын хугацаа наймдугаар сарын 25-нд дуусаж байгаа тул 25-ны өглөө 10:00 цагт Монгол Улсын Ерөнхийлөгч хүлээн авч тамирчдад цолыг нь гардуулна. Дараагаар нь 12:30 цагт Ерөнхий сайд хүлээн авч, урамшуулал, байрыг олгохоор товлосон байгаа.

Саиед Моллай, Ц.Цогтбаатар, Б.Болортуяа нарт гавьяат тамирчин, М.Уранцэцэгт Хөдөлмөрийн баатар цол олгоно.

Ц.Цогтбаатар, М.Уранцэцэг нарыг Баянхонгор аймгийнх нь нутгийн зөвлөл нь хүлээж авч байр өгсөн. Засгийн газрын наймдугаар сарын 4-ны өдрийн хуралдаанаар Хууль зүйн сайд, Нийслэл хотын дарга нарт тус бүр хоёр байр бэлдэх үүрэг чиглэл өгсөн. Мэдээж тамирчдад эцсийн шийдвэр гартал энэ талаарх мэдээлэл өгөхгүй. Холбоодуудад шийдвэрийн талаар танилцуулсан байсан. Цааш нь баг тамирчдадаа хэлдэг байгаа. Анх удаагаа Ерөнхий сайд хүрэл медаль хүртсэн болон шагналт байранд шалгарсан тамирчдад мөнгөн шагнал өгөхөөр болсон. 

---