Энэ оны Элсэлтийн ерөнхий шалгалт /ЭЕШ/ өнөөдөр Улаанбаатар хотын цагаар 10.00 цагт Монгол Улсын түүхийн хичээлийн шалгалтаар эхэлж, шалгуулагч нар 11.20 цагт шалгалтаа өгч дуусан гарч ирсэн юм.

Ингээд шалгалтын үйл явцын талаар шалгуулагч нарын сэтгэгдлийг сонслоо.

Сурагч: Миний хувьд хамгийн гол хичээл Монгол Улсын түүх байсан. Шалгалтаа амжилттай өглөө. Бага зэрэг сандарсан тэрнээс бол даалгаварын хувьд хүнд биш байлаа. Цаашид олон улсын харилцаагаар сурах тул түүх, нийгмийн шалгалт өгөхөөр бэлдсэн. Шалгалтын дүнгээ 10 минутын дараа харна.

Сурагч: Элсэлтийн ерөнхий шалгалтын хугацаа 80 минут бага юм шиг санагдлаа. Ажлын хуудсаа амжиж бөглөж дуусгасан. Шалгалтын хувьд хүнд материал ирэх байх гэж бодсон. Харьцангуй хөнгөхөн байсан. Миний хувьд цаашид эрх зүйч, маркетинг чиглэлээр суралцах бодолтой байгаа. ЭЕШ-ын дүнгээ хараад аль нэгээр нь суралцана.

Сурагч: Бүртгэл, зохион байгуулалт сайн байлаа. Өнгөрсөн долдугаар сард шалгалт өгөхөөр нэлээд бэлдсэн гэвч цар тахалтай холбоотой хойшилсон. Энэ хугацаанд амарч, зугаалж байна гээд шалгуулагч нарын хувьд бага зэрэг хичээлээ давтах нь хойшилсон байх.

Энэ удаагийн ЭЕШ цахим хичээлийн үр дүнг харуулна гэж мэргэжилтнүүд хэлж байна. Учир нь энэ жил ЭЕШ-д оролцогчдын 79 хувь нь буюу 31.782 нь ЕБС-ийн буюу 12-р ангийн сурагчид байна. Сурагчид 2 жил цахимаар хичээллэсэн учир тэдний амжилтаас цахим хичээлийн үр дүн тодорхойлогдоно гэж багш нар дурдаж байгаа юм.

Ирэх сард дахин авах ЭЕШ-д КОВИД-19-ийн халдвартай байсан хүүхдүүд оролцоно. Өмнөх шалгалтад орж амжаагүй болон  хоцорсон зэрэг бусад шалтгаанаар орох боломжгүй гэдгийг Боловсролын үнэлгээний төвийн Хэвлэл, мэдээлэл, сурталчилгаа хариуцсан мэргэжилтэн Б.Цэрэннадмид мэдээллээ.

Боловсролын үнэлгээний төв энэ сард коронавируст халдварын улмаас шалгалт өгч чадаагүй шалгуулагчдыг судалж, тэдний мэдээллийг ЭМЯ-наас авч дараагийн шалгалтад бүртгэх юм. Улмаар дараагийн шалгуулагчдад зориулсан шинэ даалгавар боловсруулах ажлын хэсгийг дахин томилно.

---