“Алтан намар" хөдөлмөрийн яармаг болж байна. Уг яармагт бүх дүүргийн Хөдөлмөр, халамж үйлчилгээний хэлтэс, хөдөлмөрийн биржүүд болон томоохон ажил олгогч компаниуд оролцож байна. Уг өдөрлөгт хориод мянган ажлын байрыг нээлттэй зарлажээ.

Зөвхөн ХАА-ын салбарт ургац хураах ажилд л гэхэд 8000 гаруй ажлын байр зарлагдаад байна. Ургац хураалтад оролцох залуусыг өдрийн 50 мянган төгрөгийн цалинтай ажиллуулах юм.

Хөдөлмөрийн бирж:

-Манай биржид 300 гаруй ажлын байр байна. Таван богд, Берлин зоог, Пицца хат гэх мэт олон байгууллага хамтран ажиллаж байна. Ихэвчлэн оюутан залууст зориулсан цагийн ажлууд байна.

Ажилд орохыг хүссэн залуусын харилцаа, хандлага, мэргэжлийг нь харгалзан тохирох ажлын байранд нь зуучилж байна.

40-ээс дээш насныхан ажил идэвхтэй хайж байгаа ч, 20 орчим насны залуус ажил хайхгүй байна

Баянгол дүүргийн Хөдөлмөр, халамж үйлчилгээний хэлтсийн мэргэжилтэн:

-Баянгол дүүрэг дээр л гэхэд 19 аж ахуйн нэгжийн 56 ажлын байрны захиалга байна. Голчлон үйлчилгээний чиглэлийн ажилтан авах захиалга байна. Тэр дундаа үйлчлэгч, худалдааны зөвлөхийн ажлын байр олон байна. Байнгын ажлын байрны дундаж цалин сая төгрөг хавьцаа байна. Дээр нь урамшуулал өгдөг.

Өмнө нь аж ахуйн нэгжүүд ихэвчлэн туршлага заадаг байсан бол сүүлийн үед туршлага заахгүйгээр, сургаад авъя гэдэг болсон. Гэвч ажил хайж ирж байгаа залуус цөөн байна. Эсэргээрээ ажилгүйдлийн тэтгэмж авах гэсэн иргэд олон байна.

Зуны амралт, зугаалгын цаг байгаа учир ажил хайж байгаа хүн бага байж болох ч харьцангуй 8 сар гарсан учир уг нь ажил эхлэх болсон баймаар. Гэтэл ажил хайгчид маш цөөн байна.

Харин ажил хайж ирж байгаа хүмүүсийн дийлэнх нь 40-өөс дээш насныхан байна. Гэтэл 20-оос дээш настай залуус ажил хайж ирэх нь бага байна.

Тухайлбал: “Хаппи сити” групп компани л гэхэд нягтлан бодогчийн ажлын байранд  заавал ажлын туршлага шаардахгүй, сургаад авъя гэж байхад ирэх хүн алга байна.

 

 

---