2021 оны Элсэлтийн ерөнхий шалалт/ЭЕШ/ 08-р сарын 19-22-ны өдрүүдэд зохион байгуулагдана. Энэ онд 40420 шалгуулагч ЭЕШ өгөхөөр бүртгүүлжээ. Тэдний нэг төлөөлөл болох 2-р сургуулийн төгсөгч Б.Батбаяраас ЭЕШ-даа хэрхэн бэлтгэж байгаа талаар нь тодрууллаа. 

2-р сургуулийн төгсөгч Б.Батбаяр: 

-Энэ онд хичээлээ тийм ч хангалттай сурч чадаагүй. Цахим хичээл төдийлөн үр дүнтэй биш байсан. Гэхдээ хувийн сургалтаар ЭЕШ-даа бэлтгэж байна. Би хими, биологийн хичээлээр бэлтгэж байна. Эмч болох зорилготой. Манай гэр бүлийнхэн дунд эмч мэргэжилтэй хүмүүс олон байдаг учраас би ч мөн эмч болохоор зорьж байна. 

Өдөрт 4-5 цагийг ЭЕШ-даа бэлтгэхэд зарцуулж байна. Танхимын сургалт л хамгийн үр дүнтэй байгаа учраас хүүхдүүд үлдсэн хугацаандаа боломж гарвал танхимын сургалт авсан нь хэрэгтэй гэж зөвлөмөөр байна...

ЭЕШ 8-р сарын 19-ний 10:00 цагт Монгол улсын түүх хичээлийн шалгалтааар эхэлнэ

ЭЕШ 8-р сарын 19-нд, Улаанбаатар хотын цагаар 10:00 цагт Монгол улсын түүх хичээлийн шалгалтаар эхэлнэ. Шалгуулагч шалгалтад ирэхдээ дараах материалыг бүрдүүлж ирнэ.

Үүнд:
-Иргэний үнэмлэх болон түүнтэй дүйцэхүйц баримт бичиг

-Бүртгэлийн хуудас / Энэ оны төгсөгч өөрийн бүртгэлийн дугаар, нууц үгээ ашиглан www.eec.mn цахим хуудасны шалгуулагчийн булангаас бүртгэлийн хуудсаа хэвлэн авч сурч буй сургуулийнхаа захирлаар гарын үсэг зуруулж, тамга даруулан баталгаажуулсан байх, өмнөх оны төгсөгчийн бүртгэлийн хуудас QR кодоор баталгаажсан байх тул шууд хэвлэн авна/

-Суудлын хуваарь /та өөрийн бүртгэлийн дугаар, нууц үгээ ашиглан www.eec.mn цахим хуудасны шалгуулагчийн булангаар нэвтэрч хэвлэж авна/

-Бүрэн дунд боловсролын гэрчилгээ

Шалгуулагч нь шалгалтад дээр заасан баримт бичгээс өөр эд зүйл /ном, дэвтэр, бугуйн цаг, ноорог цаас, тооны машин, томьёоны хураангуй, бал, гар утас ...гэх мэт/ авч орохыг хориглоно‼️

ЭЕШ-ын шалгуулагч нь өөрийн суудлын хуваарьт заасан цагийн дагуу шалгалтад ирсэн байхыг анхааруулж байна.

 

---