Эрүүл мэндийн сайд С.Энхболд НҮБ-ын Монгол Улс дахь Суурин зохицуулагч Тапан Мишраг өчигдөр хүлээн авч уулзжээ. Энэ удаагийн уулзалтаар "Ковид-19" өвчлөлийн нөхцөл байдал, цаашид авч хэрэгжүүлэх бодлого, шийдвэрийн талаар санал солилцсон байна.

Эрүүл мэндийн яамнаас "Ковид-19"-ийн эсрэг вакцинжуулалтын ажлыг үр дүнтэй зохион байгуулж, нийт хүн амынхаа 60.1 хувийг вакцинжуулсан нь маш өндөр амжилт гэдгийг НҮБ-ын Монгол Улс дахь Суурин зохицуулагч Тапан Мишра онцолжээ.

Эрүүл мэндийн сайд С.Энхболд Монгол Улсад бүртгэгдсэн тохиолдлын тоо болон Дельта хувилбар тархахаас урьдчилан сэргийлэх бодлогын арга хэмжээ, боловсролын байгууллагуудын үйл ажиллагааг аюулгүй нээх, улирлын томуугийн өвчлөл, томуугаас сэргийлэх вакцинжуулалт зэрэг бодлогын асуудлаар хэрэгжүүлж байгаа ажлууд, цаашид баримтлах стратегийн талаараа танилцуулсан аж.

Олон улсын эрүүл мэндийн багийн уулзалтыг НҮБ-ын Суурин зохицуулагч болон ДЭМБ-ын Суурин төлөөлөгчийн газраас манлайлан 2020 онд Эрүүл мэндийн яамтай хамтран хэд хэдэн удаа амжилттай зохион байгуулсан талаар Тапан Мишра дурдаж, цаашид ч НҮБ-ын зүгээс Монгол Улсын Засгийн газрын үйл ажиллагааг бүхий л талаар дэмжиж ажиллахаа илэрхийлжээ.

---