"Токио-2020" олимпын наадмын тэмцээн уралдаанаа дуусгасан тамирчид 48 цагийн дотор олимпын тосгоныг орхих журмын дагуу манай улсын ширээний теннисний тамирчид Э.Лхагвасүрэн, Б.Болор-Эрдэнэ болон боксын Б.Чинзориг нар өнөөдөр нутаг буцаж байна.

Зөрөөд удахгүй тэмцээнээ эхлүүлэх чөлөөт бөх болон хүндийн өргөлтийн тамирчид өнөөдөр Токиод хүрэлцэн ирэх юм. Энэ удаагийн олимпод Монголын чөлөөт бөхийн эмэгтэй тамирчид бүх зургаан жинд эрхээ авсан бол эрчүүд гурван жинд өрсөлдөх билээ. Харин хүндийн өргөлтөд Э.Билэгсайхан, М.Анхцэцэг нар өрсөлдөх юм.

Эдгээр тамирчид, дасгалжуулагч болон албаны хүн нийлсэн нийт 22 хүний бүрэлдэхүүнтэй баг Токиод ирэх бөгөөд чөлөөтийнхөн 8 дугаар сарын 1-нээс олимпын дэвжээнд өрсөлдөж эхэлнэ.

 

---