"Токио-2020" зуны олимпын наадмын үеэр медаль хүртсэн тамирчдад цэнхэр туузаар боосон шар, ногоон, гүн цэнхэр өнгийн жижиг цэцгийн баглааг өгч байгааг та анзаарсан байх.

Тэгвэл эдгээр нь энгийн нэгэн цэцгийн баглаа биш бөгөөд Япон улсын түүхийг агуулсан гүн гүнзгий утгыг илэрхийлж байгаа гэнэ. Тодруулбал, энэхүү цэцгийн баглаа нь Япон улс 2011 онд тохиосон аймшигт газар хөдлөлт, цунамигийн хор хөнөөлөөс өндийж байгаагийн бэлгэдэл аж.

Тухайн үед 20 мянга орчим хүн амь үрэгдэж, сураггүй алга болсон бөгөөд байшингууд тэр чигээрээ урсан одож, их хэмжээний газрууд эзгүйрсэн юм. Тэгвэл эдгээр цэцэг нь уг байгалийн гамшигт хамгийн ихээр нэрвэгдсэн гурван мужаас гаралтай аж.

Фукушимагийн Ирландын сарнай

 

Ногоон, шаргал өнгөтэй Ирландын сарнайг Фукушимад ургуулжээ. Аймшигт цунамигийн улмаас олон мянган хүн амь үрэгдсэний дараа тус муж мөн цөмийн гамшигт нэрвэгдэж, олон оршин суугчдаа нүүлгэн шилжүүлэхэд хүрсэн билээ.

Энэ газарт нэг өдөр эдгээр өнгөлөг цэцэг ургана гэж тухайн үед хэн ч санаагүй нь тодорхой. Гэвч Японы нэгэн ашгийн бус байгууллага Фукушимагийн эдийн засгийг дахин эхлүүлж, мужийг сэргээн босгох ажилд туслах зорилгоор Ирландын сарнай цэцгийг тарьж эхэлсэн байна. Үүнээс хэдхэн жилийн дараа эдгээр өнгөлөг цэцгүүд Фукушимаг чимэх болжээ.

Өмнө нь цацраг идэвхжилийн улмаас хориотой байсан хотод цэцэг тарьдаг Юкари Шимизү "Уг цэцгүүдээр дамжуулан Фукушимагийн сэргээн босголтыг дэлхий дахинд таниулна гэж найдаж байна" хэмээн ярьжээ.

Миягигийн наранцэцэг

2011 оны цунами дэгдэх үеэр Мияги мужийг аварга том давлагаанууд дайрч, орон нутгийн 10 мянга гаруй хүн амь үрэгдэж, сураггүй алга болсон билээ.

Энэхүү эмгэнэлт явдлын дараа олон эцэг, эх Миягид эргэж ирэн, нэгэн уулын энгэрт амиа алдсан хүүхдүүдийнхээ дурсгалд зориулж наранцэцэг тарьсан аж. Олимпын зохион байгуулагчид энэ талаар "Жил бүр тэр толгод наранцэцгээр бүрхэгддэг. Миягигаас ирсэн наранцэцгүүд цунамид нэрвэгдсэн хүмүүсийн дурсамжийг илэрхийлж байгаа юм" хэмээн тэмдэглэжээ.

Иватэгийн дэгд цэцэг

Миягигийн хойд талд орших Иватэ хэмээх далайн эргийн муж мөн цунамид өртөн, ихээхэн сүйрэл амссан юм. Гэхдээ энэхүү муж нь Японы дэгд цэцгийн ихэнх хувийг түгээдэг аж. Фукушима, Мияги мужуудад шинэ цэцгүүдийг шинээр тарьж, ургуулсан бол Иватэд дор хаяж 1960-аад оноос хойш дэгд цэцгийг ургуулсаар ирсэн байна.

Эх сурвалж: NPR

---