"Токио-2020" олимпын наадмын боксын төрлийн эхний өдөр МУГТ Э.Цэндбаатар эхний ялалтаа байгууллаа.
Олимпын наадмын боксын төрөлд манай улсаас гурван тамирчин өрсөлдөж байгаа ба эхний өдөр дэлхийн аваргын хүрэл, Азийн наадмын аварга, Ази тивийн хошой аварга МУГТ Э.Цэндбаатар эрэгтэйчүүдийн -57кг жингийн эхний тойрогт Кени улсын хашир туршлагатай (38 настай) Ник Окофтой тулалдаж ялалт байгууллаа. Удаах тойрогт Зүүн Азийн наадмын мөнгөн медальт Вьетнамын Нгуен Ван Донтой энэ сарын 28-ны өдөр тулалдах хуваарьтай байна.
Харин өнөөдөр хуваарь ёсоор эрэгтэйчүүдийн -63кг жинд Зэвсэгт хүчний “Алдар” спорт хороо болон Капитрон банкны тамирчин, ОУХМ Б.Чинзориг эхний тойргийн тулаанаа дэлхийн аваргын хүрэл, Ази тивийн аварга Узбекистаны тулаанч Элнур Абдуираймовтой тулалдана. /Улаанбаатарын цагаар 17:00 цагт/ Хоёр тулаанчийн хувьд хоёр сарын өмнө зохион байгуулагдсан Ази тивийн аварга шалгаруулах тэмцээнд учраа таарч манай Б.Чинзориг 5:0 харьцаагаар цэвэр ялж байлаа.
