Шинэ Зеландын баруун эргийн хэсэг үерийн гамшигт нэрвэгдэж, орон нутаг даяар онц байдал зарлан, олон мянган иргэнийг нүүлгэн шилжүүлжээ.

Тус улсад сүүлийн хоёр сарын хугацаанд их хэмжээний аадар бороо орж, Кантербери, Веллингтон хотуудад онц байдал тогтоосон байсан юм. Тэгвэл энэ удаа баруун эргийнх нь зарим хэсэгт 300 мм орчим хур тунадас унасан бөгөөд энэ нь нэг сарын дундаж хур тунадас хоёрхон хоногт төвлөрөн орсон явдал аж.

Хүчтэй аадар борооны улмаас хөрсний гулсалт үүсэж, гол мөрөн хальсан учир эрх баригчид хоёр мянга гаруй оршин суугчийг нүүлгэн шилжүүлсэн байна. Мөн тус улсын Засгийн газраас гамшигт нэрвэгдсэн дүүргүүдэд 600 мянган ам.долларын яаралтай тусламж үзүүлэхээ зарласан юм. Одоогоор Уэстпорт хотын мянга орчим оршин суугч гэртээ буцах боломжгүй хэвээр байгаа аж.

Үерийн ус одоо татарч байгаа хэдий ч бүс нутгийн бохирдлыг цэвэрлэж, хохирлыг засахад хэсэг хугацаа шаардагдана гэж мэргэжилтнүүд үзэж байна.

Шинэ Зеландын Баруун эргийн дүүргийн Эрүүл мэндийн зөвлөлөөс "Ихэнх барилга, байшинг бүрэн сэргээн засварлахад хэдэн сар шаардагдана" гэж мэдэгджээ.

Эх сурвалж: The Guardian

---