БНАСАУ-ын төрийн хэвлэл мэдээллийн хэрэгслүүд тус улсын залуу үеийнхнийг БНСУ-ын үг хэллэгийг ашиглахгүй байхыг анхааруулж, төрөлх хэлээрээ зөв ярихыг уриалжээ.

Түүнчлэн Өмнөд Солонгосын хувцас загвар, үс засалт, дуу хөгжмийг нэвтрүүлэхгүй байхыг дахин сэрэмжлүүлсэн байна. Энэ нь иргэдээ гадаадын ямар нэгэн нөлөөнд автуулахгүй байхыг зорьж буй өргөн цар хүрээтэй шинэ хуулийн нэг хэсэг юм. Уг хуулийг зөрчсөн тохиолдолд шоронд хорих эсвэл цаазаар авах ял оноож магадгүй аж.

Умардын эрх баригчид Пхеньян аялгад суурилсан солонгос хэл нь хамгийн шилдэг хувилбар бөгөөд залуучууд үүнийг зөв ашиглах ёстой гэж онцолж байгаа юм. Мөн Өмнөд Солонгосын поп соёлыг дагаж мөрдөх аюулаас сэрэмжлүүлжээ.

Аливаа гадаадын улс орны нөлөө нь Умард Солонгосын коммунист дэглэм болон удирдагч Ким Жон Уны эрх мэдэлд заналхийлэл болно гэж тус улсын эрх баригчид итгэдэг. Ким Жон Ун ч мөн "К-поп"-ыг Умард Солонгосын залуусыг завхруулдаг "харгис хорт хавдар" хэмээн нэрлээд байгаа билээ.

Гэсэн хэдий ч Умардын залуучуудын дунд гадны соёл, уран бүтээлүүд нь өргөн тархсаар байна. Эрсдэлийг үл харгалзан, хориотой кино, цувралуудыг авчрах маш нарийн хууль бус наймааны сүлжээнүүд үйл ажиллагаагаа үргэлжлүүлсээр байгаа юм.

Эх сурвалж: BBC

---