Кени улсын баруун хэсгийн Кисуму-Бусиа хотын хурдны зам дээр явж байсан шатахууны нөөцлүүр савтай ачааны машин хөмөрч, шатан, 13 орчим хүн амиа алдсан байна.

Уг ачааны машин нь өнгөрөгч бямба гарагийн орой өөр нэгэн тээврийн хэрэгсэлтэй мөргөлдсөн бөгөөд ослын газарт "асар том галт бөмбөлөг" үүссэн гэж гэрчүүд ярьжээ. Ослын дараахан эргэн тойронд нь байсан хүмүүс хөмөрч унасан нөөцлүүр савнаас шатахууныг нь гадагшлуулан зөөхөөр яаран ажилласан боловч газарт асгарсан түлшний улмаас гэнэт гал гарч, олон хүн түлэгдсэн байна.

Орон нутгийн цагдаа нарын мэдээлснээр нийт 24 хүн хүнд гэмтэлтэйгээр эмнэлэгт хүргэгдсэн бөгөөд шархадсан иргэдийн дунд хүүхдүүд байгаа аж. Мөрдөн байцаагчид одоо хэргийн газрыг үргэлжлүүлэн шалгаж байгаа бөгөөд нас барсан хүний тоо нэмэгдэж болзошгүйг анхааруулжээ.

Маланга хотын ойролцоо гарсан энэхүү ослын газарт гал сөнөөгчид хоёр цагийн дараа очсон бөгөөд галыг бүрэн унтраасан байна.

Зарим эх сурвалжуудын мэдээлснээр шатахууны ачааны машин нь эсрэг чиглэлд явж байсан сүү ачсан ачааны машинтай мөргөлдсөн гэнэ.

Эх сурвалж: BBC

---