Малайз улсад коронавирусээс урьдчилан сэргийлэн хатуу чанга хөл хорионы дэглэм үргэлжилж байна. Хатуу хөл хорионд туйлдаж ядарсан иргэд гэрийнхээ гадна цагаан өнгийн туг далбаа барьж тусламж хүсэх болжээ.

Тус улсад бага орлоготой гэр бүлүүдэд туслах #benderaputih буюу цагаан туг гэсэн хаштаг хөдөлгөөн цахим сүлжээнд өнгөрсөн долоо хоногоос эхлэн өрнөсөн байна. Энэ нь хөрш болон чинээлэг, олны танил эрхмүүд, бизнес эрхлэгчид ядарч туйлдсан бусдадаа хоол хүнс болон бусад зүйлээр тусалж дэмжихийг уриалж байгаа явдал юм.

Цар тахлыг даван гарч, халдварын тархалтыг намжаахын тулд Малайзад зургадугаар сарын 1-нээс хойш хөл хорионы дэглэм хэрэгжиж байна. Хоногт ганц удаа хоол идэж амьд үлдэхийг хичээж байгаа айл өрхүүдийн сэтгэл эмзэглүүлсэн түүхүүд тус улсын мэдээний гол сэдэв болжээ.

Хүнд цаг үеийг давж чадалгүй амиа егүүтгэх үзэгдэл нэмэгдсэн байна. Жилд 600 орчим амиа егүүтгэх явдал бүртгэгддэг байсан бол энэ жилийн эхний таван сарын хугацаанд хэдийнээ 500 орчим иргэн амиа егүүтгэснийг цагдаагийн мэдээлэлд дурджээ.

Цагаан туг хөдөлгөөнтэй зэрэгцэн хар туг кампанит ажил өрнөж байна. Энэ нь Ерөнхий сайд Мухиддин Яссиныг огцрохыг шаардсан хөдөлгөөн ажээ.

Малайз улсад хоёр сарын дотор 5,400 орчим хүн Ковид-ын улмаас амиа алдаж, хоногт 7,000 орчим халдварын шинэ тохиолдол бүртгэгдэх болсон байна. Цөөн хэдэн мужид хөл хориог сулруулсан боловч нийслэл Куала Лумпурт 20 цагаас хойш хөл хорьсон хэвээр байгаа юм. Тус улсын 32 сая хүн амын 8 хувь нь коронавирусийн эсрэг вакцинжуулалтад бүрэн хамрагдсан бол 19 хувь нь эхний тунгаа хийлгэжээ.

Эх сурвалж: ВВС

---