Ази-Номхон далайн бүс нутгийн орнууд коронавирусийн дельта хувилбарын тархалтаас урьдчилан сэргийлэхийн тулд хорио цээрээ чангатгасаар байгаа ч Сингапур улсын хувьд хэвийн амьдралдаа эргэн орохын тулд шинэ төлөвлөгөө боловсруулжээ.

Сингапурын Ковид-19-тэй тэмцэх багийн гурван гишүүн шинэ зураглал гаргасан байна. Сингапурын Худалдааны сайд Ган Ким Ён, Сангийн сайд Лауренс Вонг, Эрүүл мэндийн сайд Онг Ие Кунг нар хөл хорио, олон нийтийг тандах ажлуудыг халж, тусгаарлалтгүй аялал, олон нийтийн арга хэмжээг буцааж авчрах саналтай байгаа ажээ.

Энэ аргыг “тэг дамжуулалт” хэмээн нэрлэж байгаа юм. Хонконг зэрэг зарим бүс нутаг, улс оронд энэ аргыг сонгосон байна.

Хэрэв “тэг дамжуулалт”-ын аргыг сонговол хатуу чанга тусгаарлалтын дэглэм бараг бүгд үгүй болж, Ковид-той амьдралын хэв маягаа уусгах хэрэгтэй болно. Сингапурын Засгийн газрын дээрх гурван гишүүний үзэж байгаагаар Ковид-19 хэзээ ч бидний амьдралаас устаж үгүй болохгүй гэдэг нь муу мэдээ боловч бид хэвийн амьдралаа үргэлжлүүлэх боломжтой гэдэг нь сайн мэдээ ажээ.

“Бид цар тахлыг томуу, гар хөл амны өвчин, салхин цэцэгтэй адил аюул багатай өвчин болгон хувиргах боломжтой” гэж Сингапурын эрх баригчид үзсэн байна. Сингапур улсын хүн амын 2/3 нь энэ сарын эхэн гэхэд вакцины эхний тунг, наймдугаар сарын 9 гэхэд бүх иргэн дархлаажуулалтад хамрагдана гэсэн төлөвлөгөө гаргажээ. Халдварын тархалтыг бууруулах хамгийн үр дүнтэй арга бол вакцинжуулалт бөгөөд ингэснээр халдвар авсан ч шинж тэмдэг буурна гэж үзэж байгаа.

Хэрэв вакциныг ард иргэдэд бүрэн хийвэл халдварын тохиолдол өөрчлөгдөнө. Үүний дараа томуугийн халдварыг хянахтай төстэй замналаар цаашид явна гэсэн үг. Сингапурын Засгийн газар хүндээр өвдсөн болон эрчимт эмчилгээний тасгийн өвчтөнүүдэд анхаарч, хөнгөн хэлбэрийн халдвар авсан хүмүүс гэртээ эмчилгээгээ хийнэ. Ингэснээр эрүүл мэндийн тогтолцоо хэт их ачаалах эрсдэл буурах ажээ. Вакцинжуулалтыг сайжруулахын тулд илүү удаан хугацаанд үр дүнтэй вакцины хөтөлбөрийг санал болгож байна.

Гэхдээ шинжилгээ, хяналтыг үргэлжлүүлэх шаардлагатай гэж үзсэн байна. Мөн эмчлэх аргыг сайжруулах хэрэгтэй гэдгийг Сингапурын сайд нар зөвлөжээ. Ард иргэдийн зүгээс нийгмийн хариуцлагаа ухамсарлаж, эрүүл ахуйн дэглэмээ сайжруулах, олон нийтийн арга хэмжээнээс зайлсхийх хэрэгтэй хэмээн зааварласан байна. Дүгнэж хэлбэл вакцинжуулалт, шинжилгээ, эмчилгээ, нийгмийн хариуцлагыг цогцоор нь шийдвэрлэх хэрэгтэй гэсэн үг юм.

Эх сурвалж: CNN

---