Нидерландын эрдэмтдийн хийсэн судалгаагаар тэжээвэр амьтад коронавирусээр өвчилсөн эздээсээ халдвар авах тохиолдол их байгааг сэрэмжлүүлжээ.

Өрхийн гишүүн нь халдвар авсан 196 айлын 310 тэжээвэр амьтанд коронавирусийн PCR шинжилгээ хийсэн байна. Ингэхэд зургаан муур, долоон нохойноос халдвар илэрчээ. Харин 54 амьтанд коронавирусийн эсрэг биет илэрсэн байна.

Энэ нь тэжээвэр амьтад халдвар авсан эздээсээ коронавирусийн халдвар авах магадлал 20 хувьтай байгааг харуулж байгаа юм. Өөрөөр хэлбэл халдвар аваад эдгэсэн амьтдад эсрэг биет тогтсон ажээ.

Утрехтийн их сургуулийн доктор Элс Броенс “хэрэв та Ковид-оор өвчилсөн бол хүмүүсээс гадна тэжээвэр амьтдаас зай барих хэрэгтэй” гэдгийг сануулжээ.

Тэжээвэр амьтад коронавирус тээгч болж, өөр хүнд халдааж болзошгүй гэж үзэж байна. Гэхдээ одоогоор тэжээвэр амьтнаас хүн халдвар авсан тохиолдлыг батлаагүй байгаа юм. Дэлхийн зарим улс оронд тэжээвэр амьтдыг вакцинжуулаад эхэлжээ.

Эх сурвалж: ВВС

---