Төрийн мэдлийн, Монгол орны өнцөг булан бүрт салбартай, төрийн байгууллагын ажилтнууд бүгдээрээ шахам үйлчлүүлдэг, төсвийн бүх байгууллага харилцдаг Төрийн банкийг зарим ажилтан нь луйвардаж, тонох явдал удаа дараа гардаг.

Хууль журмаа зөрчин, маш богино хугацаанд БНХАУ-ын “Шинжан шинфан” компанид 20 тэрбум төгрөгийн зээл олгосон хэрэгт удирдах албан тушаалтнууд нь ял шийтгүүлээд буй. Мөн 4.7 тэрбум төгрөгийн зээл олгохдоо 98 000 ам.долларын хахууль зээлдэгчээс авсан захирлуудын гэм буруутайг шүүх эцэслэн тогтоосон. Дээд шатны удирдах албан тушаалтнууд нь уг хэрэгт холбогдсон юм.
Тэгвэл тус банкны дунд шатныхан албан тушаалаа урвуулж, хадгаламж эзэмшигчдээ луйвардсан хэрэг ч бас бий. Тодруулбал, Төрийн банкны Тээврийн товчоон дахь салбарын захирал Ч.Ариунгэрэл, ахлах теллер С.Алтанчимэг, вип теллер Б.Мөнхсүрэн нарт холбогдох, хадгаламж эзэмшигчдийн дансны мэдээлэлд нэвтрэн их хэмжээний мөнгөтэй хүмүүсийн данснаас хуурамч баримт бүрдүүлэн зээл авсан гэх хэргийн нэмэлт мөрдөн байцаалт дуусан, удахгүй анхан шатны шүүхэд шилжүүлэхээр бэлтгэж байна.

Тэдний хэргийг анх ЭЦА-ны Эдийн засгийн гэмт хэрэгтэй тэмцэх газрынхан илрүүлэн шалгаснаас хойш багагүй хугацаа өнгөрлөө. Улмаар уг хэргийг АТГ-ын Мөрдөн шалгах хэлтэст шилжүүлэн байцаалтыг үргэлжлүүлж, өдгөө яллах дүгнэлт үйлдүүлэн шүүхээр шийдвэрлүүлэх саналаа илэрхийлэн НПГ-т дахин хүргүүлээд буй аж. Уг хэргийг хэрхэн шийдвэрлэсэн талаар цаг тухайд нь бид мэдээлэх болно.
Анхан шатны нэгжид ажилладаг гэж үзэж болох Төрийн банкны АТМ-ы засвар үйлчилгээ хариуцсан ажилтан Х.Дөлгөөн мөн л банкаа тонож 50-иад сая төгрөг хулгайлсан хэрэг үйлдсэн.  Тэрбээр 2019 оны есдүгээр сарын 14-15-нд шилжих шөнө Чингэлтэй дүүргийн VII хорооны нутаг, Зурагтын шинэ эцэс дэх АТМ-ы сейфний цоожны голыг өрөмдөж онгойлгон 45.9 сая орчим төгрөг хулгайлсныг НЦУГ-ын Мөрдөн шалгах газрынхан илрүүлсэн юм. Тэрбээр хулгайлсан мөнгөө ээжийнхээ эмчилгээ, эхнэрийнхээ сургалтын төлбөр, автомашин, хашаа байшингаа засах, ах, дүү нартаа унаа авч өгөх, зээлэх зэрэгт зарцуулан үрэн таран хийснээ хүлээсэн аж.
Энэ хэргийг шалгах явцад Төрийн банкны ажилтнуудын хариуцлагагүй үйлдэл ч тодорхой болсон байна. Тухайлбал, гэрч У.Б-гийн мэдүүлснээр “Х.Дөлгөөн мөнгө хураах ажлаа хийдүүлж, архи уусан, 50 000 төгрөг өгч миний оронд гараад өгөөч гэснээр хэрэг гардаг өдөр ээлжид гарсан” гэжээ.

Түүнчлэн 2019 оны есдүгээр сарын 11-нээс хойш Чингэлтэй дүүргийн VII хорооны нутаг, Зурагтын шинэ эцэс дэх АТМ-ы хяналтын камер ямар ч бичлэг хийгээгүй. “Воком” ХХК нь Төрийн банктай гэрээ байгуулж, АТМ-уудын дотор камер суурилуулахад тохиргоог нь буруу хийж, ажилтан дутуу шалгаж авснаас болж бичлэг хийгээгүйг банкныхан өөрсдөө хүлээн зөвшөөрсөн байх юм. Үүнийг нь АТМ-ы засвар үйлчилгээ хариуцсан ажилтан Х.Дөлгөөн овжин ашиглаж хулгай хийж. Гудамжинд жирийн иргэдэд агсарч, хэл амаар доромжилдог Төрийн банкны хамгаалалтын албаныхан ч энэ үед хариуцлагагүй хандаж, хулгайн хэрэг гарчихаад байхад мэдээгүй байжээ. Энэ талаар гэрч Б.С “Бид эхлээд Гаалийн ерөнхий газар, Зуун айлын “Атлас”, 32-ын тойргийн “Бүрд” худалдааны төв, “Нарантуул-2”, “Хүчит шонхор” захын бэлэн мөнгөний машинууд болохгүй байна гэсэн мэдээллийн дагуу оччихоод тав дахь буюу Зурагтын шинэ эцэст байрлах АТМ-ы гадаа ирэхэд мөнгөний сейфний хаалга онгорхой байсан” хэмээн мэдүүлсэн байгаа юм.
Чингэлтэй дүүргийн Эрүүгийн хэргийн анхан шатны шүүх Төрийн банкны АТМ-ы засвар үйлчилгээ хариуцсан ажилтан Х.Дөлгөөн болон түүнийг хэрэг хийсний дараа орж мөнгө завшсан Э.Энхбаяр, Б.Шинэбаатар нарт холбогдох хэргийг хэлэлцэн шийдвэрлэж, ял шийтгэсэн байна. Тухайлбал, Х.Дөлгөөнийг Эрүүгийн хуулийн тусгай ангийн 17.1-2.4 дэх хэсэгт заасан учрах саадыг арилгах зорилгоор тусгайлан бэлтгэсэн зэвсгийн чанартай зүйл хэрэглэн бусдын эд хөрөнгийг хулгайлсан гэм буруутайд тооцож, гурван жил зургаан сар хорих ял оноов. Улмаар хулгайлсан 45.9 сая шахам болон АТМ-ы даатгалын 8.9 сая төгрөгийг түүнээс гаргуулж, “Номин даатгал” ХХК-д олгуулахаар болжээ. Харин Э.Энхбаяр, Б.Шинэбаатар нарыг эд хөрөнгө завшсан гэм буруутай гэж дүгнэн тус бүрийг нь 700 000 төгрөгөөр торгох ял шийтгэсэн аж.

---