Дэлхийн эрүүл мэндийн байгууллагын судалгаагаар ХДХВ буюу ДОХ-ын шинээр халдварласан тохиолдол Европ тивд хамгийн их байна гэжээ. Тэр дундаа зүүн Европт ДОХ-ын халдвар нэн аюултай түвшинд хүрсэн байгааг анхаарууллаа.

Өнгөрсөн жилд Европт 160,000 орчим шинэ тохиолдол илэрсний 130,000 нь зүүн Европын орнуудад байсан нь урьд өмнө тохиолдож байгаагүй өндөр тоо юм байна. Тодруулбал 100,000 хүн тутамд 51 шинэ тохиолдол илэрчээ. Харин баруун Европын орнуудад 100,000 тутмын 6 нь ДОХ-ын халдвар шинээр авсан гэж судалгааны явцад гарсан байна. Төв Европт үүнээс хоёр дахин бага буюу мөн тооны хүмүүсийн 3 нь шинээр халдварласан гэжээ.

Улс орон бүрээр салгавал ОХУ-д ДОХ-ын халдвар авагсад хамгийн их байгаа юм. 100,000 хүн тутамд 71 шинэ тохиолдол илэрчээ. Дараа нь Украйн, Беларусийн иргэд орж байна.

Дэлхийн эрүүл мэндийн байгууллага болон НҮБ-ын ХДХВ-ын хөтөлбөр хариуцсан газрын хамтарсан төслөөр 2020 он гэхэд 90-90-90 зорилтод хүрэхээр төлөвлөжээ. Өрөөр хэлбэл ДОХ-ын халдвар авсан байж болзошгүй хүмүүсийн 90 хувийг оношилж, оношлогдсон өвчтнүүдийн 90 хувийг эмчилгээнд хамруулж, эмчилгээнд хамрагдсан хүмүүсийн 90 хувьд нь халдварын тархалтыг зогсоох зорилт тавьсан байна.

2017 онд дэлхий дээр ХДХВ тээгч 36,9 сая иргэн амьдарч байна гэжээ. Үүнээс Африк тивд 25,7 сая нь байгаа юм. 2020 онд шинээр халдварлах тохиолдлыг 78 хувиар бууруулна гэж Дэлхийн эрүүл мэндийн байгууллага үзэж байна.

 

Эх сурвалж: www.cnn.com

---