Засгийн газар вакцинд хамрагдсан иргэдээ урамшуулж, 50 мянган төгрөг олгож буй. Улсын хэмжээнд 18-аас дээш насны хүн амын зорилтот бүлгийн 60 хувь нь буюу 2.1 сая хүн вакцинд хамрагдах тооцоо бий. Тэдний 1.8 сая буюу 88.6 хувь нь вакцины нэг, хоёрдугаар тунд хамрагдаж, 50 мянган төгрөг авчээ.

Өнгөрсөн долоо хоногоос жирэмсэн эмэгтэй, 16-17 насны хүүхдүүдийг дархлаажуулж эхлээд байна. Вакцинд хамрагдсан хүүхдүүдэд урамшууллын 50 мянган төгрөг олгоно гэж Сангийн яамнаас мэдээлэв. 

Монгол Улсын иргэн бүрт вакцины урамшуулал 50 мянган төгрөгийг дансаар олгоход ямар ч асуудалгүй. Өмнө нь 300 мянган төгрөг олгосон данс буюу хүүхдийн мөнгөний дансаар олгож байна. 

Монгол Улс 1.1 сая хүүхэдтэй. Тэдний 219 мянга орчим нь 15-18 насныхан. Статистик мэдээллээр, 10-14 насны 299512, 5-9 насны 388928, 0-4 насны 381639 хүүхэд бий. Цар тахлын үед эрсдэлд байгаа хүүхдүүдээс эхний ээлжинд ийнхүү 16, 17 настнуудыг вакцинд хамруулж эхэлсэн бол удалгүй 12 насны хүүхдүүдийг дархлаажуулахаар Эрүүл мэндийн яам, Засгийн газар төлөвлөөд буй.

• 16-17 насны 34,629 иргэн сайн дураараа дархлаажуулалтад хамрагдсан байна
• Иргэн бүрт олгож буй 300,000 төгрөгийн дэмжлэгийг 3,368,106 иргэнд буюу 98,9 хувьд нь олгосон
• Ажлын байр дэмжих 3 хувийн хүүтэй зээлд 18,551 иргэн, ААН хамрагдаж 1 их наяд 377,5 тэрбум төгрөгийн зээл олгогдсон
• Ипотекийн зээлд 405 тэрбум төгрөгийн санхүүжилтийг 5,463 иргэнд олгосон
• Хөдөө аж ахуйг дэмжих 500 тэрбумын зээлд 15,784 зээлдэгч хамрагдаж 207 тэрбум төгрөгийн зээл олгогджээ.

---