Пакистан улсад түргэн хоолны газрын 19 ажилтныг баривчлан саатуулсан байна. Учир нь тэдгээр ажилтнууд цагдаагийн офицеруудад үнэ төлбөргүй бургер өгөхөөс татгалзжээ.

Лахор хотын Жони ба Жуну нэртэй сүлжээ зоогийн газарт энэ явдал өнгөрсөн долоо хоногт болсон байна. Сүлжээ зоогийн газрын ажилтны ярьснаар анх удаа ийм зүйл тохиолдоогүй ажээ.

Цагдаа нар олуулаа ирж үнэгүй бургер өгөхийг шаардсан ч зоогийн газрын ажилтнууд татгалзжээ. Удалгүй буюу хоёр хоногийн дараа цагдаа нар эргэн ирж ажилтнуудыг дарамталж, ор үндэслэлгүй хэрэгт буруутгасан байна. Зоогийн газрын бүх ажилтнуудыг баривчлан саатуулах ажиллагаа долоон цагийн турш үргэлжилжээ.

Цагдаагийн есөн офицер уг хэрэгт холбогдсон байна. Тэдгээр офицеруудыг хууль зөрчиж, шударга бус үйлдэл гаргасан гэж үзэн ажлаас нь түдгэлзүүлсэн ба удахгүй тохирох шийтгэлийг онооно гэж цагдаагийн ахлах офицер Инам Гани албан ёсоор мэдэгджээ.

Эх сурвалж: ВВС

---