Хятадын эрх баригчид энэ сарын эхээр "Синовак" вакциныг 3-17 насны хүүхдүүдэд тарихыг зөвшөөрсөн бөгөөд удалгүй "Синофарм" вакцинд мөн адил зөвшөөрлийг олгожээ. Одоогоор уг дархлаажуулалтын хөтөлбөр хэзээ эхлэх нь тодорхойгүй байна.

Тус улс нь энэ оны эцэс гэхэд нийт хүн амынхаа 80 хувийг коронавирусийн эсрэг вакцинжуулах зорилт тавиад байгаа бөгөөд үүнийг биелүүлэхийн тулд хэдэн арван сая хүүхдийг дархлаажуулж эхлэх хэрэгтэй юм.

Өөрөөр хэлбэл, нийт 1.4 тэрбум хүн амтай тус улс нь ойролцоогоор 1.12 тэрбум иргэнээ вакцинжуулснаар сүргийн дархлаа тогтоох боломжтой бөгөөд үүний тулд 14-өөс доош насны 254 сая хүүхдийн ихэнхийг нь дархлаажуулах шаардлагатай болно гэсэн үг.

Хүүхдүүд насанд хүрэгчдээс илүү амархан халдвар авч байгаа хэдий ч хүнд шинж тэмдэг илрэх нь бага байгаа тул олон нийтийн дунд халдвар хурдацтай тархах нэг шалтгаан болж байгааг эрүүл мэндийн мэргэжилтнүүд онцолж байгаа билээ. Иймээс дэлхийн улс орнуудын вакцинжуулалтын кампанит ажлын хүрээнд хүүхдүүдийг мөн дархлаажуулах хэрэгтэй гэж үзэж байгаа юм.

Гэвч энэ нь вакцины хүртээмж болон эргэлзээтэй байдлаас шалтгаалан хялбар хэрэгжих боломжгүй байна. Хангалттай вакцинтай улс орнууд ч мөн бэрхшээлтэй тулгарч байгаа бөгөөд ихэнх нь насанд хүрэгч хүүхдүүдэд вакцин тарих нь аюулгүй гэдэгт итгэхгүй байгаа аж.

Тэгвэл Засгийн газруудаас ийм төрлийн зөвшөөрөл олгох нь сүргийн дархлаад хүрэх эхний алхам юм. Одоогийн байдлаар АНУ, Канад, Сингапур болон Хонконгийн эрх баригчид 12-оос дээш насны хүүхдүүдэд "Файзер" вакциныг тарихыг зөвшөөрөөд байгаа билээ.

Мөн "Синовак" болон "Синофарм" вакциныг хэрэглэж буй Бразил, Индонез зэрэг олон арван улс оронд мөн адил зөвшөөрлийг олгон, хүүхдүүдийг вакцинжуулж эхлэх магадлалтай юм.

Эх сурвалж: Associated Press

---