Украин улсын нийслэл Киевт байрладаг Биотехнологи ба бичил биетний омог судлалын шинжлэх ухааны хяналтын хүрээлэнгийн нэгэн ажилтан аюултай амьтны вирус агуулсан хуруу шилнүүдийг хулгайлсан гэж тус улсын Ерөнхий прокурорын газраас мэдээлжээ.

Албаныхны мэдэгдэлд "Хүрээлэнгийн хуучин ажилтан эмэгтэй нь амьтдад халдварт өвчин үүсгэдэг, хил хязгаараас үл хамааран өргөн уудам газар нутагт хурдан тархах аюултай вирусийн омгийг агуулсан хуруу шилнүүдийг хулгайлсан. Тэрээр хүрээлэнгийн вирусийн омгуудад нэвтрэх эрх бүхий албан тушаалтай байсан" хэмээн тэмдэглэсэн байна.

Тус эмэгтэйн хулгайлсан хуруу шилнүүдэд "Вирулент Ньюкасл" халдварт өвчнийг үүсгэгч жижиг организмууд байсан аж. Энэхүү халдварт өвчин нь олон төрлийн зэрлэг ба тэжээвэр шувуунд нөлөөлдөг бөгөөд хүнд дамжин халдварладаг байна.

Түүнийг саатуулсан мөрдөн байцаагчид "Сэжигтэн нь дээр дурдсан вирусийн омгийг зарж, борлуулах зорилгоор гэртээ хадгалж байсан. Тэрээр хуруу шилнүүдийг хөргөгчдөө хадгалж байсан" хэмээн мэдээлжээ. Хууль хяналтынхан одоо уг эмэгтэйг албан тушаалаа урвуулан ашиглаж, бусдын эд хөрөнгийг завшсан хэрэгт буруутгаж байгаа юм.

Эх сурвалж: TASS

---