Өмнөд Солонгосын гол сөрөг хүчин болох "Ардын хүч" намын тэргүүнээр 36 настай улстөрч И Жүн Сок сонгогджээ. Ингэснээр тэрээр тус улсын томоохон намуудын түүхэн дэх хамгийн залуу удирдагч болж байгаа юм.

Хууль тогтоогчийн туршлагагүй И нь нийт саналын 43.8 хувийг авч, ялалт байгуулсан болох нь өнөөдөр буюу 6 дугаар сарын 11-ний өдөр баталгаажсан байна. "Ардын хүч" намын гишүүд ба иргэд өнгөрөгч даваа гарагаас пүрэв гарагийн хооронд цахимаар болон утсаар саналаа өгсөн аж. И Жүн Сокийн эсрэг олонд сайн танигдсан дөрвөн ахмад улстөрч өрсөлдсөн бөгөөд тэдний хоёр нь намын бүлгийн даргын үүрэг гүйцэтгэж байсан нэр хүндтэй улстөрчид байжээ.

Тус улсын хамгийн том консерватив намын шинэ даргыг намын их хурлаар албан ёсоор зарласан бөгөөд тэрээр үүрэгт ажилдаа шууд орон, хоёр жилийн турш намаа удирдах юм. Тэрээр мөн ирэх оны 3 дугаар сард болох БНСУ-ын Ерөнхийлөгчийн сонгуулиар сөрөг хүчний гол намыг чиглүүлэх учир иргэдийн зүгээс ихээхэн хүлээлт үүсээд байна.

Харвардын их сургуулийг төгссөн И Жүн Сок нь анх 2011 онд "Ардын хүч" намд Онцгой байдлын түр удирдах зөвлөлийн гишүүнээр элсэж байжээ. Тэрээр тухайн үед 26 настай байсан аж.

Парламентын гишүүнээр ажиллаж байгаагүй тэрээр намын дарга болохоор өрсөлдөж эхлэхэд хэн ч түүнийг ялалт байгуулна гэж төсөөлөөгүй юм.

Гэвч түүний нэр хүнд хурдацтай өсөж, олон нийтийн санал асуулгыг тэргүүлж эхэлсэн бөгөөд өнгөрсөн 5 дугаар сарын сүүлээр зохион байгуулсан намын даргын анхан шатны сонгуульд ялалт байгуулсан байна. Ингээд И Жүн Сок тус улсын хэвлэл мэдээллийн анхаарлын төвд орон, нэр хүнд нь огцом өсөж байгаа билээ.

Түүний ялалт нь сонгогчид консерватив намыг шинэчлэх хүсэлтэй байгааг харуулж байна гэж шинжээчид үзэж байгаа юм.

Эх сурвалж: Yonhap News Agency

---