Булган аймагт томоохон уул уурхайн компаниуд хууль бусаар алт олборлож, хүний эрхийг зөрчиж байгаа асуудлаар ЗГХЭГ-ын дарга Ц.Нямдоржид хандан, иргэн Д.Туяа мэдээлэл хийлээ.

Greennews.mn сайтын сэтгүүлч, экологич Д.Туяа: 

-Булган аймагт сүүлийн 20 гаруй жил уул уурхайн компаниуд идэвхтэй үйл ажиллагаа явуулж байна. Үүний сөрөг нөлөөгөөр 2018 оны байдлаар Булган аймагт 40 тэрбум төгрөгийн байгаль экологийн хохирол учраад байна.

“Бүрдэл майнинг” ХХК хууль зөрчин сүүлийн гурван жил алт олборлож байгаа. Тус компанийн талаар аймгийн иргэд 2020 оны наймдугаар сард аймгийн цагдаагийн газар гомдол гаргасан ч өнөөдрийг хүртэл ямар нэгэн арга хэмжээг аваагүй.

Мөн Булган аймгийн Бүрэгхангай сумын Дэрст багийн нутаг дэвсгэрт "Монголросцветмет" ТӨҮГ уул уурхайн үйл ажиллагаа явуулсаар удаж байна. Уул уурхайн зориулалтаар ашигласан талбайд тухайн байгууллага нөхөн сэргээлт хийхийг хуулинд тодорхой тусгаж өгсөн байдаг. Гэтэл тус ТӨҮГ нь олборлолт хийсэн талбайдаа сүүлийн арав гаруй жилийн хугацаанд нөхөн сэргээлт хийгээгүй.

Энэ мэт бусармаг үйлдэлд аймаг, сум орон нутгийн удирдлагууд онцгой анхаарал хандуулж, тухайн бүс нутагт амьдарч буй малчин ард иргэдийн эрхийг хамгаалах үүрэгтэй. Харамсалтай нь байгалийн баялгийг зүй зохисгүй ашигласан, нөхөн сэргээлт хийлгүй олон жилийн нүүр үзэж байгаа уг асуудалд аймаг, сумын үе үеийн удирдлагууд хуулийн хүрээнд анхаарал хандуулахгүй байсаар өнөөдрийг хүрлээ. "Монголросцветмет" ТӨҮГ-ын нөхөн сэргээлт хийлгүй орхисон талбайд 2018-2019 онд мэргэжлийн байгууллагаар хохирлын үнэлгээ тогтоолгоход 4,6 орчим тэрбум төгрөгийн хохирол учруулсан нь тогтоогдоод байна.

Уул уурхайн компаниуд Байгалийн баялгийг нутгийн удирдлагуудтай үгсэн хуйвалдан, ухаж сүйтгэж байна. Энэ асуудлыг зохион байгуулалттай байгаль орчны эсрэг гэмт хэрэг гэж үзэж байна. Булган аймгийн хяналтын прокурор, цагдаагийн байгууллагынханд хяналт тавьж, орон нутгийн иргэдийн эрхийг зөрчиж байгаа асуудлыг шийдвэрлэж өгөхийг ЗГХЭГ-ын дарга Ц.Нямдоржоос хүсэж байна гэв.

---