Энэтхэгийн баруун хэсгийн Пуна хотын захад орших химийн үйлдвэрт гал гарч, дор хаяж 18 хүн нас баржээ.

Тус үйлдвэрт өнгөрөгч даваа гарагийн 15:45 цагийн орчимд гал гарсан бөгөөд 37 ажилчин барилга дотор түгжигдсэн байна. Гал сөнөөгчид хүмүүсийг аврахын тулд үйлдвэрийн хоёр талын ханыг эвдэх шаардлагатай болсон бөгөөд ажилтнуудын заримыг нь амжин аварчээ. Одоогоор гал гарсан шалтгааныг тогтоогоогүй байгаа гэж албаны хүмүүс мэдээлсэн байна.

Уг үйлдвэр нь ихэвчлэн ус цэвэршүүлэхэд ашигладаг хлорын давхар ислийн бүтээгдэхүүн үйлдвэрлэдэг бөгөөд "SV Aqua Technologies" компанид харьяалагддаг аж. Пирангут хэмээх аж үйлдвэрийн бүсэд хэд хэдэн өөр үйлдвэр байрладаг ба ихэнх ажилтан нь ойрхон амьдардаг байна.

Энэтхэгийн Ерөнхий сайд Нарендра Моди амь үрэгдсэн ажилтнуудын гэр бүлд эмгэнэл илэрхийлэн, тэдэнд 200 мянган рупи буюу 2,800 ам.долларын нөхөн олговор олгоно гэж мэдэгдсэн юм. Тэрээр түүнчлэн гэмтэж бэртсэн хүмүүсийн нөхөн төлбөрт 690 ам.доллар амласан байна. Мөн галд шатсан үйлдвэрийн байрладаг Махараштра мужийн Засгийн газар хохирогчдын ар гэрийнхэнд 6,800 ам.долларын нөхөн олговор өгнө гэжээ.

Эх сурвалж: BBC

---