АНУ-ын Коннектикут мужийн нэгэн эмэгтэй гэрээсээ сураггүй алга болсноосоо хойш жил гаруйн дараа орон нутгийн эмнэлгээс олдсон бөгөөд тэрээр 40 кг хүртлээ турсан байжээ.

53 настай Моника Декер нь 2020 оны 4 дүгээр сарын 8-ны өдөр Бриджпорт хот дахь байшингаасаа гарч явснаасаа хойш сураггүй алга болсон аж. Тэгвэл түүний охин Шейла Ясин энэ сарын 3-ны өдөр өөрийн "Фейсбүүк" хуудаснаа "Цагдаа нар ээжийг минь олсон гэх баяртай мэдээг та бүхэнд дуулгаж байна. Тэр эсэн мэнд бөгөөд аюулгүй байгаад Бурхандаа талархъя. Ээж маань 40 кг жинтэй болсон байсан бөгөөд одоо эмнэлэгт хэвтэн, эмчлүүлж байгаа. Надад үнэхээр хэцүү байна. Хариултыг нь мэдэхгүй асуултуудад оюун санааны хувьд бэлэн биш байна" хэмээн бичжээ.

Бриджпортын цагдаагийн хэлтсийн мөрдөгч Кеннет Маккеннагийн хэлснээр албаныхан Моникаг өнгөрөгч 5 дугаар сарын 31-нд олсон байна.

Тэрээр мөн "Түүний алга болсон явдалд гэмт хэргийн шинжтэй зүйл байхгүй" хэмээн мэдэгдсэн бөгөөд нэмэлт мэдээлэл өгөхөөс татгалзжээ.

Моника Декерийг анх сураггүй алга болох үеэр цагдаа нар түүний автомашиныг гэрийнх нь гаднаас олсон бөгөөд тэрээр гар утас зэрэг бүх хувийн эд зүйлээ гэртээ үлдээсэн байсан аж. Гэвч удалгүй мөрдөн байцаагчид түүнийг Тоби Робертс гэх эрэгтэйтэй хамт явсан гэж үзэх болсон байна.

Түүнчлэн, Моника 2020 оны 5 дугаар сарын эхээр Вермонт мужийн Уилмингтон дахь бэлэн мөнгөний машинаар дансны үлдэгдлээ шалгасан боловч гүйлгээ хийгээгүй нь тогтоогджээ. Мөрдөн байцаагчид хяналтын камерын бичлэгийг шалгаж үзэхэд Моника нэгэн үл таних эрэгтэйн машинд суугаад явсан аж.

Эх сурвалж: NBC News

---