Италийн Сардин арлаас далайн эргийн элс, хясаа хулгайлсан хэдэн арван хүнд ойролцоогоор 3,650 ам.долларын торгуулийг ногдуулаад байгаа талаар орон нутгийн хэвлэлүүд мэдээлжээ.

Тус арлын эрх баригчдын мэдээлснээр өнгөрөгч бямба гарагт саатуулагдсан 41 этгээд нь далайн эргээс нийт 100 орчим кг зүйлийг хулгайлсан байна. Сардины алдарт цагаан элс нь уг арлын үнэт эрдэнэ бөгөөд эргээс элс авахыг хатуу хориглодог аж.

Гэвч жуулчид тус арлын элсийг дурсгал болгон хадгалах, эсвэл цахим дуудлага худалдаагаар зарахын тулд савлан, хулгайлах тохиолдол ихээр гардаг байна. Үүний улмаас Сардин арлын элс, хайрга, хясааны наймааг 2017 онд хууль бус болгожээ.

Энэ төрлийн мөрдлөгийн ажлын хүрээнд Сардины цэрэг, гаалийн цагдаа нар нисэх онгоцны буудал, боомтуудад тогтмол хяналт тавьж, хууль бус борлуулалт хийдэг вэбсайтуудыг илрүүлдэг аж. Албаныхан энэ жил нийт 15 мянга гаруй ам.долларын торгууль ногдуулаад байгаа бөгөөд хураан авсан зүйлсийг боломжтой тохиолдолд авсан газарт нь буцааж тавьдаг байна.

Эх сурвалж: BBC

---