АН-ын нэр дэвшигч С.Эрдэнийн дансыг хаасан талаар тус намынхан мэдээлэл хийж, ШШГЕГ-т шаардлага хүргүүллээ.

Санхүүгийн бодлогын зөвлөлийн дарга Д.Ганбаяр:

-АН-ын нэр дэвшигчийн сонгуулийн хандивын дансыг хаасан. Ингэснээр нэр дэвшигч өөрийн данстай байх, тэр дансаар дамжуулж хандив авах, сонгуулийн зардал гаргах боломжийг нь хааж байна. Энэ бол өрсөлдөгчөө шударга бусаар нэр дэвших боломжийг нь хааж, нэр дэвших эрхэд нь ноцтой нөлөөлж байгаа эрх баригчдын үйлдэл гэ бид үзэж байна.

Өмгөөлөгч Г.Батбаяр:

-6-р сарын 2-нд Нийслэлийн ШШГА-ны алба хаагч Т.Гарьд гэдэг хүн шийдвэр гаргаж АН-ын нэр дэвшигчийн дансыг хаасан. Ингэснээр хөдөө орон нутгууд дахь ухуулагчийн цалин олгох, хэвлэл мэдээлэл цацах, түгээх зардал гаргах боломжгүй болсон. Уг асуудлаар Т.Гарьдад хандаж, уг шийдвэрээ цуцлахыг шаардсан ч үл тоосон.

Ингээд Хаан, Төрийн банк, Голомт банкины дансыг битүүмжилсэн. Улмаар Хаан банкны данснаас хүчээр өөрийн дансанд мөнгө төвлөрүүлж байна гэдэг мэдээлэл ирсэн. Энэ нь эрх баригч намаас өрсөлдөгчөө санхүүгийн чадамжгүй болгож байгаа үйлдэл гэж бид үзэж байна. Мөн тухайн алба хаагчийг төрийн сонгуульд саад хийж байна гэж үзэн Эрүүгийн хэрэг үүсгүүлэн ТЕГ-т хүргүүлсэн.

-Дансыг нь буцаагаад нээсэн гэх мэдээлэл байна?

-Буцаагаад нээсэн мэдээлэл байхгүй.

-ШШГА-аас 21 сая төгрөгийн өр, авлагатай байсан учир дансыг нь хаасан гэж мэдээлсэн?

-25 сая төгрөгийн өр авлагын асуудал гарч ирсэн. Энэ нь АН-ын шүүхэд төлөөлөх этгээд байхгүй гэх УДШ-ийн шийдвэр гарчихсан байхад 2021 оны 1-р сарын 20-нд ямар нэгэн АН-ыг төлөөлөгчгүйгээр шүүхийн шийдвэр гаргасан. Үүнийгээ бидэнд мэдэгдэхгүй байж байгаад 3-р сард ШШГГ-т очоод, 6-р сарын 2-ны өдөр “АН өр төлбөртэй байгаа учир эднийг сонгуульд оролцуулах чадамжгүй байдалд оруулъя” гэдэг санаа зорилготойгоор эрх баригч нам өөрийн хэрэгжүүлэгч агентлагаар дамжуулж хийсэн үйлдэл гэж бид харж байна.

АН-ын НБД Ц.Оюундарь:

-Хамгийн гол нь энэ хууль, шүүхийн байгууллагууд улс төрөөс хараат бусаар ажиллах ёстой. Бие даасан хуулийг хэрэгжүүлэх үүрэг хүлээдэг. Гэтэл эрх баригчдын захиалгаар сонгуулийн үйл ажиллагааг зогсоох хэмжээний шийдвэр гаргаж байгаа нь харамсалтай.

---