"Үрхэн" эмнэлгийн эмч нарын буруутай үйл ажиллагааны улмаас нялх үрээ алдсан Ц.Өнөболд манай телевизэд хандсан юм. Тэрбээр ""Үрхэн" эмнэлэг зургаахан сартай хүүд минь буруу тариа хийж алчихаад уучлалт ч гуйгаагүй" хэмээн өгүүллээ. 

Иргэн Ц.Өнөболд: 

-Хүүгийн маань хоолой нь өвдөж, бага зэрэг халуурсан. Хөл хориотой байсан учир хувийн "Үрэлхэн" гэж эмнэлэгт хандсан. Хувийн эмнэлэг хүн цөөтэй, үйлчилгээ сайтай гээд төлбөрөө төлөөд үйлчлүүлсэн. Тус эмнэлгийн захирал О гэдэг хүн өөрөө үзсэн. Мөөгөнцөртсөн байна гэж хэлсэн. Ингэхдээ ямар нэгэн сорил тавиагүй. Сувилагч С гэдгээр үрэвслийн эсрэг тариа гэж хэлээд тарьсан. Энэ тарианы дараа хүүгийн маань биеийн байдал огцом муудаад, тав хоногийн дараа буюу гуравдугаар сарын 28-нд өнгөрсөн. Зургаахан сартай, миний ганц хүү байсан. Одоо болтол эхнэрийн маань сүү нь ширгээгүй байна. Хүүхэдтэйгээ холбоотой сэжүүр гарахаар уйлаад, сэтгэл санаагаар уначих юм. 

29-нд задлан хийж үзэхэд "Үрэлхэн эмнэлэг хүүхдийн оношийг буруу тавьсан. Буруу эмчилгээ хийсэн, цаг алдсан байна" гэсэн. Гэтэл сүүлдээ миний хүүг жингийн илүүдэлтэй байснаас нас барсан гэж үзэж байна. Би гаргаж болох бүх газарт гомдол гаргана. Миний хүү зургаан сар хүртлээ ямар ч өвчтэй байгаагүй. Эв эрүүл хүүхэд байсан. Вакциндаа цаг тухайд нь хамрагдаж байсан. Өрхийн эмнэлгийн "эрүүл бойжиж байгаа" гэсэн тодорхойлолт нь ч хүртэл байгаа. Эмнэлгийнхэн манай гэр бүлтэй холбоо барьж, уучлалт гуйгаагүй. Би гуйтал нь гомдол гаргаж явна. Маш гомдолтой байна...

---