Беларусь улсын эрх баригчид ихэнх иргэдээ гадаадын улс орнууд руу зорчихыг түр хугацаагаар хоригложээ. Тус улсын Хилийн хорооноос мэдэгдсэнээр зөвхөн албан ёсны аялалд явж буй Беларусийн төрийн алба хаагчид болон улсын тээврийн ажилтнууд гэх мэт тодорхой бүлгийн хүмүүсийг тус хязгаарлалтаас чөлөөлөх аж.

Тус хорооны албан ёсны мэдэгдэлд "Олон иргэн гадаадын орнуудаас олгосон оршин суух зөвшөөрөл дээр үндэслэн Беларусь улсаас гарах хүсэлтийг ирүүлж байна. Одоогийн байдлаар зөвхөн гадаадад байнга оршин суудаг хүмүүсийг Беларусиас гарахыг зөвшөөрч байна. Харин гадаадын улс орнуудын түр хугацааны оршин суух бичигтэй иргэдийг гаргахгүй" хэмээн тэмдэглэжээ.

Түүнчлэн уг шинэ журам нь гадаадын иргэдэд ч мөн хамаарах аж. Беларусь дахь гадаадын иргэд 10 хоногийн тусгаарлалтаа дуусгасныхаа дараа л тус улсаас гарч явах боломжтой гэж албаныхан мэдээлсэн байна. Беларусийн иргэд энэхүү хилийн хязгаарлалтыг шүүмжлэн, эсэргүүцэж байгаа бол эрх баригчид тус арга хэмжээг коронавирусийн цар тахалтай холбон тайлбарлаж байгаа юм.

Гэвч олон шинжээчид үүнийг саяхан болсон "Ryanair" компанийн нислэгтэй холбоотой асуудлын улмаас гаргасан шийдвэр гэж үзэж байна. Беларусь улс тэсрэх бөмбөгийн анхааруулга зарлан, Грекээс Литва руу нисэж байсан "Ryanair"-ийн нисэх онгоцыг Минск рүү чиглүүлснийхээ дараа дотор нь зорчиж явсан сөрөг хүчний сэтгүүлчийг баривчилсан юм. Энэ явдлын дараа Европын Холбооны олон орон Беларусийн үндэсний агаарын тээврийн "Belavia" компанийг агаарын зайд нь нислэг үйлдэхийг хориглосон бөгөөд өөрсдийн агаарын тээврийн компаниудаа мөн Беларусийн агаарын зайнаас зайлсхийхийг тушаасан билээ.

Беларусийн Ерөнхийлөгч Александр Лукашенко өнгөрсөн оны 8 дугаар сарын 9-нд болсон сонгуульд ялалт байгуулснаасаа хойш өрсөлдөгчдийнхөө эсрэг хатуу арга хэмжээ авах болсон бөгөөд олон хүн цөллөгт эсвэл шоронд ороод байгаа юм. Харин түүний гол өрсөлдөгч Светлана Тихановская өөрийгөө ялалт байгуулсан гэж үзэж байгаа хэдий ч аюулгүй байдлын үүднээс хөрш Литва улс руу нүүсэн билээ.

Эх сурвалж: BBC

---