БНХАУ-ын эрх баригчид бодлогын томоохон өөрчлөлт хийж, тус улсын хосуудыг гурав хүртэлх хүүхэдтэй болохыг зөвшөөрчээ. Энэхүү шийдвэр нь Хятадын өтөлж буй хүн ам болон эрс буурсан төрөлттэй холбоотой аж.

Тус улсад олон арван жилийн турш хэрэгжсэн "Нэг өрх-нэг хүүхэд" бодлого 2016 онд цуцлагдсан бөгөөд үүнээс хойш гэр бүлүүд хоёр хүртэлх хүүхэдтэй болох боломжтой болоод байсан билээ. Гэвч энэхүү сулруулсан хязгаарлалт нь төрөлт тогтвортой өсөхөд хүргэж чадаагүй юм.

Тэгвэл энэ удаагийн алхмыг БНХАУ-ын дарга Си Зиньпин Коммунист намын дээд албан тушаалтнуудын уулзалт дээр баталсан байна. Тус шинэ бодлого нь "Манай улсын хүн амын бүтцийг сайжруулах, хөгширч буй хүн амтай идэвхтэй тэмцэх, хүний ​​нөөцийн давуу талыг хадгалахад тус дөхөм болохуйц арга хэмжээнүүдтэй хамт хэрэгжих болно" гэж "Синьхуа" агентлаг мэдээлжээ.

Гэвч олон улсын хүний ​​эрхийн байгууллага болох "Amnesty International" нь тус шинэ бодлогыг өмнөх хязгаарлалтуудтай адил хүний нөхөн үржихүйн эрхийг зөрчсөн хэрэг гэж үзэж байгаа юм. Тус байгууллагын БНХАУ-ын багийн ахлагч Жошуа Розенцвейг "Засгийн газрууд иргэдээ хэдэн хүүхэдтэй болохыг зохицуулах эрхгүй. Хятад улс нь төрөлтийн бодлогоо "оновчтой болгох" гэж хичээхээс илүүтэйгээр ард түмнийхээ амьдралын сонголтыг хүндэтгэж, хүмүүсийн гэр бүл төлөвлөлтийн шийдвэрийг хянах түрэмгий, шийтгэлтэй хяналтыг зогсоох ёстой" хэмээн мэдэгдсэн байна.

Түүнчлэн зарим шинжээчид энэхүү "Гурван хүүхдийн бодлого"-ын үр нөлөөнд эргэлзэж байгаагаа илэрхийлжээ. Германы "Commerzbank"-ийн ахлах эдийн засагч Хао Жоу "Хэрэв төрөлтийн бодлогыг зөөлрүүлэх нь үр дүнтэй байсан бол өмнөх "Хоёр хүүхдийн бодлого" ч мөн үр дүнтэй байх ёстой байсан. Гэхдээ одоо хэн гурван хүүхэдтэй болохыг хүсэх билээ? Залуу хүмүүс хамгийн ихдээ хоёр хүүхэдтэй болох боломжтой. Төрөлтийн түвшин бага байгаагийн суурь асуудал нь хэт өндөр амьдралын зардал болон асар их нийгмийн дарамт юм" хэмээн тайлбарлажээ.

Эх сурвалж: BBC

---