ХБНГУ ба Словакийн албаныхан вьетнамчуудыг Герман болон Европын бусад оронд хууль бусаар нэвтрүүлдэг байсан гэмт хэргийн бүлэглэлийг илрүүлж, хоёр сэжигтнийг баривчилсан гэж орон нутгийн эрх баригчид мэдээлжээ.

Тус зохион байгуулалттай бүлэг нь хуурамч визээр Европ руу нэвтрүүлсэн вьетнамчуудаасаа их хэмжээний төлбөр шаарддаг байсан бөгөөд тэднийг массажны төв, биеэ үнэлэх газар болон бусад газарт албадан ажиллуулж, өрийг нь төлүүлдэг байсан аж. Мөрдөн байцаагчдын тогтоосноор сэжигтнүүд 15,800-25,600 ам.долларын төлбөр шаарддаг байжээ.

Энэ хэрэгтэй холбоотой мөрдөх ажиллагааны хүрээнд Берлиний цагдаа нар тус хотод амьдардаг вьетнам эмэгтэйг баривчилсан бол Братиславын цагдаа нар нэгэн словак эмэгтэйг баривчилсан байна. Тэдний хамаардаг бүлэг нь хэд хэдэн вьетнам, нэг герман, хоёр словак хүнээс бүрддэг гэж албаныхан тогтоогоод байгаа юм.

Цагдаа нар өнгөрөгч даваа гарагт Германы хэд хэдэн газарт дайралт хийсэн бөгөөд энэ үеэр тус улсад хууль бусаар оршин сууж байсан 13 хүнийг илрүүлжээ.

Эх сурвалж: Associated Press

---