Зээлдэгчдийн холбооноос үндсэн зээл болон зээлийн хүүг зогсоож, эргэн төлөх хугацааг дахин 6 сар хойшлуулах шаардлагыг Засгийн газарт хүргүүллээ.

Монгол Улсын Засгийн газраа 2021 оны долдугаар сарын 1-н хүртэл ипотекийн зээлтэй иргэд үндсэн зээл болон хүүгээ нэг удаа хойшлуулж болно гэсэн. Бусад төрлийн зээлтэй иргэд банкандаа хандаа зээлийн хүүгээ хойшлуулах боломжийг олгосон. Энэ нь зээлтэй иргэдэд маш их нэмэр болсон хэмээн Зээлдэгчдийн холбооны тэргүүн Ц.Солонго дурдсан.

Зээлдэгчдийн холбооны тэргүүн Ц.Солонго: Зээл хойшлуулах шийдвэр гарсны дараа халдварын нөхцөл байдал хүндэрч, удаа дараа хөл хорио тогтоосон. Энэ хугацаанд үйл ажиллагаа явуулах нөхцөл байгаагүй.

Долдугаар сарын 1-нээс зээлтэй байсан иргэд үндсэн зээлээ, хүүтэйгээ төлж эхэлнэ. Гэтэл өнөөдрийн байдлаар зарим аж ахуйн нэгжүүд үүд хаалгаа ч нээгээгүй, зарим аймаг, сумдад хөл хориотой байна.

Өнгөрсөн сараас үйл ажиллагаа жигдэрч байгаа энэ үед иргэд, аж ахуйн нэгжүүд долдугаар сарын 1-нээс үндсэн зээлээ төлж чадахгүй байдалд байна. Банкнууд эхнээсээ зээлээ төлөхийг шаардаж эхэлж байна. Засгийн газар нэг удаа зээлийн хугацаанд өөрчлөлт оруулсан шийдвэрээ дахин сунгах хэрэгтэй гэж үзэн шаардлага хүргүүлж байна. Аж ахуйн нэгжүүдийн үйл ажиллагаа бүрэн сэргэх хүртэл 2022 оны нэгдүгээр сар хүртэл үндсэн зээл болон зээлийн хүүг зогсоож, эргэн төлөх хугацааг дахин 6 сар хойшлуулах шаардлагыг хүргүүлж байна. 

---