АНУ-ын эрх баригчид Европын улстөрчдийг тагнах ажиллагаанд Данийн нууц алба тусалсан гэж тус улсын хэвлэл мэдээллийн агентлагууд мэдээлжээ. Энэхүү нууц ажиллагааны хүрээнд ХБНГУ-ын канцлер Ангела Меркелийг 2012-2014 оны хооронд тандсан гэх мэдээлэл байгаа юм. 

Тодруулбал, Дани улсын Батлан хамгаалахын тагнуулын алба АНУ-ын Үндэсний аюулгүй байдлын газартай хамтран, Европын нэр бүхий улстөрчдийн талаар мэдээлэл цуглуулсан гэж "Danmarks Radio" агентлаг мэдээлжээ. АНУ-ын албаныхан Данийн интернэт кабелийн сүлжээнд нэвтрэн, хэд хэдэн нэр хүндтэй хүний гар утасны яриа, мессежний мэдээллийг цуглуулсан гэж тус тайланд дурдсан байна.

Уг тагнуулын ажлын хүрээнд Герман, Франц, Швед, Норвегийн албан тушаалтнуудын нууц мэдээллийг цуглуулсан бөгөөд канцлер Меркелээс гадна Германы тухайн үеийн Гадаад хэргийн сайд Франк-Вальтер Штайнмайер болон сөрөг хүчний удирдагч Пийр Штайнбрук нарыг мөн онилсон аж.

"Danmarks Radio" агентлагийн эрэн сурвалжлах баг Данийн Батлан хамгаалахын тагнуулын албаны нууц мэдээлэлд нэвтрэх боломжтой есөн эх сурвалжтай ярилцан, энэхүү тайланг бэлтгэн, дэлгэсэн байна. Тэгвэл тус улсын Батлан ​​хамгаалах яам болон Тагнуулын албанаас одоогоор албан ёсны тайлбар өгөөгүй байгаа юм.

Сонирхолтой нь, үүнтэй ижил төстэй мэдээлэл 2013 онд гарч байсан билээ. Тухайн үед АНУ-ын шүгэл үлээгч Эдвард Сноуден тус улсын Үндэсний аюулгүй байдлын агентлаг Германы канцлерын гар утсыг чагнадаг гэх мэдээллийг ил болгож байсан юм.

Эх сурвалж: BBC

---