Энэтхэгийн зүүн хэсэг болон хөрш зэргэлдээ Бангладеш улсыг өнгөрөгч лхагва гарагт хүчтэй хар салхи дайрч өнгөрөн, зургаан хүний аминд хүрчээ. Энэтхэгт 1.1 сая гаруй хүнийг нүүлгэн шилжүүлэх шаардлагатай болсон байна.

"Yaas" гэх нэртэй энэхүү хар салхи нь эх газарт хүрэхээс өмнө Одиша, Баруун Бенгал мужуудад хүчтэй аадар бороо орсны улмаас хоёр хүн амиа алдаж, олон тооны байшин эвдэрсэн гэж албаныхан мэдээлсэн юм. Салхины хурд цагт 130-140 км-т хүрсэн гэж Энэтхэгийн Цаг уурын газраас мэдэгдсэн байна. Одоо хар салхи хуурай газарт бүрэн буусан тул салхины хүч суларна гэж мэргэжилтнүүд тооцоолж байгаа аж.

Бангладешт 200 тосгоны олон мянган хүн далайн түрлэгийн улмаас гацаж, гэр орон, дэлгүүр, аж ахуй нь үерт автжээ. Патуахали дүүргийн өмнөд хэсгийн Рангабали дахь голын хоёр далан нурж, 20 гаруй тосгон усанд автсан байна. Тул улсад дор хаяж 15 мянган хүнийг хүүлгэн шилжүүлж, хорогдох байранд оруулах шаардлагатай болсон аж.

Энэтхэг улс нь коронавирусийн халдварын томоохон давлагааны улмаас хүнд хэцүү нөхцөл байдалд ороод байгаа бөгөөд энэ удаагийн хар салхи нь цар тахалтай тэмцэх хүчин чармайлтыг улам хүндрүүлж байна. Өнгөрсөн долоо хоногт "Tauktae" хар салхи тус улсын баруун эргийг дайрч, 140 гаруй хүний ​​аминд хүрсэн билээ.

Эх сурвалж: Associated Press

---