Израилын нийслэл Иерусалим хотын Бейт Ханина орчмын цагдаа нар 11 настай палестин хүүг баривчилж байгааг харуулсан бичлэг цахим ертөнцөд ил болон, ихээхэн шүүмжлэл өдөөж байна.

Хүүхдийн эрхийг хамгаалах олон улсын байгууллагын Палестины салбарын төлөөлөгчийн мэдээлснээр цагдаа нар тус хүүг Израилын суурьшигчид руу чулуу шидсэн гэж буруутган, баривчилжээ. Баривчилгааны үеэр түүний зургаан настай охин дүү нь уйлан, цагдаа нараас ахыгаа тавьж явуулахыг гуйж байсан аж. Орон нутгийн албаныхны мэдээлснээр одоо тус хүүг сулласан гэнэ.

Хэдийгээр Газын зурваст харилцан гал зогсоож, аюулт мөргөлдөөн эцэс болоод байгаа хэдий ч Палестины идэвхтнүүд дэлхий дахиныг эрх чөлөө, тэгш эрхийн төлөөх тэмцлээс нүүр буруулахгүй байхыг уриалж байгаа юм. Израилын эрх баригчид Палестины иргэдийн эсэргүүцлийн жагсаалыг бослого гэж тодорхойлон, жагсаалд оролцсон палестинчуудыг ихээр баривчилж эхлээд байгаа аж.

Израилын цагдаагийн байгууллага өнгөрөгч даваа гарагийн үдээс хойш гэхэд дор хаяж 74 палестин хүнийг баривчилжээ. Палестины зохиолч Мариам Баргути "Израилын цэрэг, цагдаа нар Лидд болон Палестины бусад хотуудад үй олноор нь баривчлах ажиллагаа явуулж, мөргөлдөөний дараах "оноогоо тэнцүүлэхээр" оролдож байна. Энэ бол бидний анхааруулж байсан зүйл. Дэлхий дахин анхаарлаа хандуулахаа больсон даруйд Израил бид биднийг онилж эхэлдэг" хэмээн өөрийн "Твиттер" хуудаснаа бичжээ.

Эх сурвалж: The Intercept

---