Итали улсын Маггиоре нуурын уулархаг бүс нутагт дүүжин тэрэг унаж, 14 хүн нас баржээ. Нас барсан иргэдийн дунд бага насны хүүхэд байгаа бөгөөд өөр нэг хүүхэд хүндээр бэртэж гэмтсэн байна.

Зорчигчид аялал амралтын Стреса тосгоноос буцаж явжээ. Израйлийн Гадаад хэргийн яам амь насаа алдсан хохирогчдын дунд улсынх нь таван иргэн байгааг мэдэгдсэн байна.

Орон нутгийн цагаар ням гарагт 12:30 минутад осол болжээ. Ослын шалтгаан тодорхойгүй ч дүүжин замаар явж байсан тэргэнцэр 20 метрийн өндрөөс газарт унасныг тогтоосон байна. Мод таарч зогсох хүртэл унасан тэргэнцэр уулын бүсэд өнхөрсөөр байжээ.

Ойролцоо алхаж байсан уулчид ослын дуу чимээ гарахыг сонссон байна. Ослын газарт аврагчид хүрэх маш хүндрэлтэй байжээ. Гал сөнөөгчдийн машин туслахаар явж байсан ч замдаа өнхөрсөн ба аврагчид бэртэж гэмтээгүй байна.  

Далайн түвшнээс дээш 1,500 орчим метр өндөрт баригдсан дүүжин зам 20 минутын хугацаанд нэг тэргэнцэрт 40 орчим зорчигч тээвэрлэх хүчин чадалтай. Хамгийн анх 1970 онд үйл ажиллагаагаа эхлүүлж, 2014-2016 оны хооронд техникийн шинэчлэл хийж, дахин үйл ажиллагаагаа нээсэн байна.

Эх сурвалж: ВВС

---