Африкийн зүүн эргийн ойролцоох Сейшелийн арлууд нь дэлхийн хамгийн өндөр вакцинжуулалтын хувьтай орноор тодроод байгаа хэдий ч тус улсад коронавирусийн халдварын тохиолдол огцом өсөх болжээ.

Нийт 100 мянга орчим хүн амтай тус арлын орны иргэдийн 60 гаруй хувь нь цар тахлын эсрэг дархлаажуулалтад бүрэн хамрагдаад байгаа хэдий ч халдварын өсөлтийн улмаас шинэ хязгаарлалтууд тогтоох шаардлагатай болсон байна.

Сейшелийн арлууд нь жижиг улс тул өдөр тутмын халдварын тоо нь төдийлөн их биш мэт санагдах боловч хүн амын тоотой нь харьцуулахад ноцтой түгшүүр төрүүлж байгаа юм. Тус улсад өнгөрөгч 4 дүгээр сард шинээр бүртгэгдсэн халдварын тоо нь өдөрт дунджаар 50 орчим байсан бол энэ сарын дунд үе гэхэд өдөрт дунджаар 400 тохиолдол шинээр нэмэгдэх болсон байна.

Орон нутгийн Эрүүл мэндийн яамны мэдээлснээр халдвар авсан хүмүүсийн гуравны нэг орчим хувь нь вакцины хоёр тунгаа тариулсан иргэд аж. Сейшелийн арлуудтай адил хүн амынхаа нэлээд хэсгийг бүрэн вакцинжуулаад байгаа бусад улс орнуудад шинээр бүртгэгдэж буй халдварын тоо нь хамаагүй бага байгаа гэнэ.

Тус улсад эхлээд БНХАУ-ын үйлдвэрлэсэн "Синофарм" вакциныг хэрэглэж байсан бол цаашлаад Энэтхэгийн "Ковишиелд" болон "Оксфорд-АстраЗенека" вакциныг оруулж ирсэн бөгөөд хамгийн сүүлд ОХУ-ын "Спутник V" вакциныг ашиглаж эхлээд байгаа юм. ДЭМБ-аас Хятадын "Синофарм" вакциныг цар тахлын халдварын эсрэг 79 хувийн үр дүнтэй гэж мэдэгдсэн билээ. Мөн Сейшелийн арлуудад илрээд байгаа коронавирусийн Өмнөд Африкийн мутацийн хувилбараас "АстраЗенека" вакцин хэр сайн урьдчилан сэргийлэх нь эргэлзээтэй байгаа аж.

Зарим эрүүл мэндийн мэргэжилтнүүд тус улсад аялал жуулчлал эргэн нээгдэж, эдийн засгийн идэвхжил нэмэгдсэнтэй холбоотойгоор халдварын тархалт өссөн байж магадгүй гэж таамаглаж байна.

Эх сурвалж: BBC

---