Нийслэлээс сонгогдсон гишүүд Улаанбаатар хотын хөгжлийн бодлого хариуцсан Түр хороо байгуулж байгаа ажээ. Түр хороо нийслэлд тулгамдаж байгаа асуудлуудыг шийдвэрлэхийн төлөө ажиллана.

УИХ-ын гишүүн Б.Бат-Амгалан: Түр хороо гурван бодлогыг гол зорилгоо болгон ажиллана. Үндсэн хуулийн өөрчлөлтийн дагуу явж байгаа эрх зүйн шинэчлэлийн хүрээнд Нийслэлийн эрх зүйн байдлын тухай хууль, Хот тосгоны эрх зүйн байдлын тухай хууль, Улаанбаатар хотод тулгамдаж байгаа асуудлуудыг шийдвэрлэх гарц, гаргалаа олох, эрх зүйн хэм хэмжээг олгох чиглэлээр ажиллана.

Нийслэлийн нийгэм, эдийн засгийн өнөөгийн нөхцөлийг сайжруулахад дэмжин тусалж, хянан шалгах чиглэлээр ажиллана.
Мөн хоттой холбоотой өмчийн тухай хууль, нийслэлийн эрхзүйн байдлын тухай гэх мэт хуулиудыг хэрэгжүүлэх, өөрчлөх чиглэлд ажиллах юм.

УИХ-ын гишүүн Ж.Сүхбаатар: Түр хороо бол УИХ-ын байнгын хороо шиг статустай ажиллана. Түр хороо албан ёсны шийдвэр гаргадаг, албан ёсоор чиглэл өгч ажилладаг, мөн ажлаа тайлагнаад явдгаараа давуу талтай.

УИХ-ын дарга Улаанбаатар хотын асуудлыг Төвлөрлийг сааруулъя, Түгжрэлийг бууруулъя, Татварын эрхзүйн байдлыг бүрдүүлье, ... гэж таван Т-ээр тодорхойлсон. Эдгээр асуудлуудыг шийдвэрлэхийн төлөө Түр хороо ажиллана.

УИХ-ын гишүүн Б.Энхбаяр: Туул гол дагуу 19 газарт бургас тайрч, устгаж бетонон барилга барьж байна гэдэг мэдээлэл бий. Уг нь Туул голоо дагаад зөвхөн иргэд амарч, зугаалдаг байх ёстой. Тиймээс Улаанбаатар хотоос сонгогдсон гишүүд бид тэр барилгуудыг буулгуулах шаардлагыг Нийслэлийн засаг даргад хүргүүлнэ.

---